Gáivuona ovdagottečoahkkimis mannan vahkkus jienasteigga Frode Lervoll (KrF) og Siv Nina Myrvoll (IKB) vuostá addimis doarjaga juoiganprošektii. Frode Lervoll ákkastalain dáinna ahte son lea vuostá doarjumis maidege mas dahkamuš luđiin. Gáivuona Sámesearvvi jođiheaddji Tor Mikalsen atná dán unohassan. – Man guhkká galgat gullat gárren sápmelačča birra mii juoigá? jearrá son. Tor Mikalsen lea maid NSR sámediggeáirras Davvi Romssas.

Heivemeahttun balddáhallat

– Lea heivemeahttun balddáhallat gárreolbmuiguin 1950-logus go lea sáhka prošeaktadoarjagis mánáide ja nuoraide 2007:as, dadjá Tor Mikalsen.  Son jáhkká ahte eatnasat odne vásishit luođi buriid musihkkadovdduiguin, nu go omd. konsearttain Riddu Riđđu festiválas. – Goas galget dákkár ovdagáttut luođi ektui jávkat ja luohti baicca dohkkehuvvot? jearrá Mikalsen.

- Mis leat dál olu čeahpes nuorra juoigit, dadjá Tor Mikalsen. - Juoigan lea ođđaáigásaš kulturdovdomearka mii leavvá, ja muhtomiidda maid šaddá birgejupmin. – Luohti lea maid šaddan Davvi-Norgii kultuvrrálaš eksporterengálvu. Artistat, dego Mari Boine, Adjágas ja Vajas leat bures beaggán gaskariikkalaččat, Mikalsen čujuha.  

Diehttu dárbbašuvvo jávkkadit ovdagáttuid

- Risttalaš Álbmotbellodaga Frode Lervoll lea ieš duođaštussan dasa ahte dárbbašuvvo oahpahus luođi birra. Framtid i Nord áviisas 20.02 son dadjá luođi birra ahte lea áddemeahttun ja veadjemeahttun ipmirdit mii das dahpáhuvvá. – Go skuvllas oahppá luođi birra de maid ipmirdišgoahtá buorebut ja ovdagattut jávkaduvvet, dadjá Mikalsen.

Mii guoská čuoččuhusaide ahte ii leat goassege gullon luohti Gáivuonas, de oaivvilda Mikalsen ahte dát leat dušše árvádusat. – Nu go musihkadutki Ola Graff dadjá, de dáppe ge lea gullon luohti ovdal dáruiduhttima, loahpaha Mikalsen.

Tor Mikalsen, tlf. 993 26 744