Stuorradiggi mearridii geassemánus 2000 ásahit Sámeálbmotfoandda, mas lea 75 milljuvnna ruvnnu. Foandda ulbmil lea ruhtadit doaimmaid mat nannejit sámegiela ja sámi kultuvrra. Foanda lea Stuorradikki bealis ásahuvvon oktasaš buhtadussan sámi álbmogiid dáruiduhttin politihka vahágiid ovddas.

30 milljuvnna reantu čoggon

Lea jo lahka čieža jagi áigi go foanda ásahuvvoi. Dáid jagiid lea foanda renten 30 milljuvnna ruvnnu. Sámediggi bijai 2002:is gáibádusa ahte oahppováillat sámiid buhtadusáššit galget leat čielgan ovdal go sáhttá váldit atnui Sámeálbmotfoandda. Šallobuhtadusortnet lea ge dan maŋŋel viiddiduvvon vai oahppováillat sámit ožžot buhtadusa. Vuosttaš šallobuhtadusat máksojuvvojedje mannan čavčča.

Jáhkásaččat rente foanda 4,5 milljuvnna ruvnnuin, ja lea Sámediggi mii hálddaša dáid ruđaid. Sámeálbmotfoandda njuolggadusaid mielde sáhttet sihke searvvit, organisašuvnnat ja ovttaskas olbmot ohcat ruđa foanddas.

Sámediggepresideanta Aili Keskitalo celkkii ođđajagesárdnistis ahte dán jagi mielde galgá geaváhišgoahtit foandda reanttuid, mat dál leat čoggon 30 miljuvnna ruvnnu.- Dáruiduhttinpolitihka váikkuhusat joatkašuvvet ain, ja mii fertet nannoseappot goazahit dan – ja geahččalit jorgalahttit dán ovdáneami, celkkii Keskitalo.

Sihkkarastit boahtteáiggi min gielaide ja kultuvrii

Sámediggepresideanta deattuhii ge sárdnistis ahte resursat dárbbášuvvojit bargui sámegielain ja kultuvrrain. Aili Keskitalo oaivvilda ahte 10 milljuvnna ruvnnu dáin ruđain berre adnojuvvot sámegiel girjjálašvođa nanosmahttimii. – Dás lea stuorra ávki sámi čállingiela, fága- ja kulturgaskkusteami nannemii, celkkii Sámediggepresideanta.

NSR jođiheaddji Silje Karine Muotka doarju presideantta áigumušaid. – Mii dárbbašit eanet sámegiel girjjálašvuođa, ja erenoamážit šaddi buolvva váste, dadjá Muotka. Son oaivvilda ahte ovdánahttit sámegiela čálagiellan lea dehálaš sámegiela boahtteáiggi sihkkarastimis. – Ealáskahttit sámegiela lea okta dain stuorimus hástalusain mat mis lea. Dat gáibida nággárvuođa ja olu návccaid sámi servvodagas, dadjá Silje Muotka.   

Dehálaš ságastallat foandda birra

Silje Muotka deattuha ahte lea dehálaš ságastallat dan birra masa foandda reanttu atnit. – Mis leat olu eanet dárbbut go maid dát ruhta gokčá, dadjá Muotka. Son oaivvilda ahte lea dehálaš vuđolaččat jurddašit mo vuoruhit ruđa juksan dihte ulbmiliid. – Sámi kultuvra lea girjái ja fátmasta olu surggiid, ja mii bákkus fertet vuoruhit go ruhtaseahkas lea botni, dadjá Muotka. Silje Muotka sávvá ge ahte olbmot buvttašedje oaiviliiddiset mainna lágiin vuoruhit dán 30 milljuvnna mii dál lea čoggon reantun.

Sámediggi lágida rabas seminára distaga guovvamánu 13. beaivvi mas fáddá lea Sámeálbmotfoandda geavaheapmi. NSR jođiheaddji rámida Sámediggeráđi go lágida dákkár seminára dán dehálaš fáttás. Son sávvá ahte nu oallugat go vejolaš boađašedje čuovvut seminára. – Leat čeahpes logaldallit, ja jáhkán seminára leat miellegiddevažžan, loahpaha Silje Muotka.

Seminára programma gávnnat Sámedikki neahttasiiddus