- Jos boazodoallu galgá ceavzit, de fertejit rámmaeavttut leat jierpmálaččat ja rievttalaččat. Ja ii leat álggage jierpmálaš ahte astoáigefatnasiid eaiggádat sáhttet oastit divahis diesela astoáigeulbmiliidda, go boazodoallit gal eai beasa oastit divatvuoliduvvon boaldámuša. Divahis boaldámuš lea deaŧalaš oassi vuođđoealáhusaid rámmaeavttuin Norggas, ja danne lea váttis áddet ahte ii gávdno vástesaš ortnet boazodolliide, dadjá Keskitalo.

Stuorra golut boazodollui
2005s mávssii ealáhus 13,2 miljon ruvnno geardedivada dárbbašlaš reaidduid ja boaldámuša oastima oktavuođas. Jos ealáhusas livčče lean seammalágan divatortnet go eanadoalus lea, de livččii boazodoallu dušše 2005s seastán measta 12 miljon ruvnno.

Sámi boazodoalu ollislaš rehketdoallu Norggas čájeha ahte golut mat čatnasit boazodollui lassánit, man oktavuođas stuorámus gollun leat investeremat, doaibma ja geahpádusat mašiinnain ja reaidduin. Oktanaga dainna unniduvvojit boazodoalu dietnasat.

Dárbu divatbuhtadussii
- Lea dárbu oažžut divatbuhtadusa investeremiidda ja doibmii. Buoret ja rievttalaš rámmaeavttut leat deaŧaleamos bealit guhkes áiggi positiivvalaš ovdáneapmái ja eanet gánnáhahtti boazodollui. Dás lea sáhka dan áidna, sierra eamiálbmotealáhusa birra min riikkas. Dat ii leat deaŧalaš dušše barggolašvuhtii sámi guovlluin, muhto dat lea seammás deaŧalaš sámi servodaga gielalaš ja kultuvrralaš ovddideapmái, dadjá Keskitalo.

2007 boazodoallošiehtadallamat, stáhta ja Norgga Boazosápmelaččaid Riikkasearvvi (NBR) gaskka, leat álggahuvvon. NBR váldogáibádus lea ahte boazodoallit oččošedje divahis boaldámuša mohtorfievrruide mat geavahuvvojit ealáhusas, ja dasto divahis investeremiid doaibmareaidduin, nie movt ortnegat leat eanadoalus.