Lene Hansen Norgga Sámiid Riikkasearvvis (NSR) rámida Trond Giske ja Kulturdepartemeantta go leat ratifiseren guokte dehálaš UNESCO-konvenšuvnna: Kulturcealkámušaid máŋggašlájatvuođa konvensuvdna ja ii-ávnnaslaš kulturárbbi várjaleami konvenšuvdna.

- Stuorra dáhpáhus sámiide ja eará eamiálbmogiidda juste danne go multinašunála fitnodagat dávjá leat rievidan eamiálbmogiid dáidaga ja kultuvrra ja alcces háhkan ruhtadietnasa attekeahttá maidege álbmogii geain leat suoládan dáidaga ja kultuvrra, cealká Lene Hansen Norgga Sámiid Riikkasearvvis (NSR).

Lene Hansen (NSR) čujuha Disney-fitnodahkii USAs mii leat geavahišgoahtán árbevirolaš muitalusaid indiánarprinseassa birra ja dainna diinen miljovnnaid ja Amerihká eamiálbmogat gis ellet geafivuođas reserváhtain. Son čujuha maid dasa mo farmasiijaindustriija lea ávkki atnán San-álbmoga dálkkasšaddomáhtus Kalahariguovllus. Maiddái Suoma turistaindustriija lea ráhkadahttán sámi kultuvrra Kiinnás, eaige sámit ieža leat beassan miehtat dasa, eaige diinet maidege das.

- Dákkár ávkkástallan ii leat maŋgeláhkái dohkálaš. Eamiálbmogiid ferte várjalit. Dál leat 69 riikka ratifiseren konvenšunna ja mii leat lávken rivttes guvlui. Sáme- ja eamiálbmotsymbolat sáhttet áinnas šaddat dovddusin, muhto mii fertet gáibidit ahte multinašunála fitnodagat galget juoga addit ruovttoluotta daidda eamiálbmogiidda mat addet sidjiide álgojurdaga, cealká Lene Hansen Norgga Sámiid Riikkasearvvis (NSR).

Konvenšuvnna ulbmil lea várjalit njálmmálaš árbevieruid ja cealkimiid, dáidaga, sosiála dábiid ja vieruid, rituálaid ja allabasiid ávvudanvugiid, luonddumáhtolašvuođa ja diehtu gomuvuođas, árbevirolaš duodjemáhtolašvuođa ja maiddái addit friddjavuođa ráhkadit, gaskkustit ja gilvit viidát árbevirolaš kulturovdanbuktimiid.