Riddoguolástuslávdegoddi ja sámi vuoigatvuođat
Riddoguolástuslávdegoddi, oktan jođiheddjin dr. juris Carsten Smith, doalai álbmotčoahkkima Álttás 15.01.06. Čoahkkin lei buorre čoahkkin mas ságastallalaimet erenoamážit vuotnaguolásteddjiid dilis. Guolásteddjiin ledje máŋga gelddolaš ja buorit ságastallamat ja čilgejedje vuotnaguolásteami vejolašvuođaid ja maiddái hástalusaid dán guovllus.

Vuotnaguolásteddjiin leat gáržon vuoigatvuođat
Vuotnaguolasteaddjit vásihit hirbmat deattu go juo regulerenpolitihkka lea mannan nu boastut. Áhpeguolástusfatnasat ja luossašaddadanrustegat báhkkejit vuonaide. Vuotnaguolásteaddjit eai báljo beasage resurssaide.

Badjelmeara ollu bivdin lea dahkan ahte vuotnaguolásteaddjit eai beassat joatkit fanaskvohtaiguin go reguleremat álggahuvvojiedje -80 logu loahpahgeahčen ja -90 logus. Fleksibel lotnolasealáhussii čuožai dát hui garrasit. Árbevirolaš vuotnaguolásteapmi lea oallemuddui mearrasámi guolásteapmi. Earát maid leat dieđosge bivdán vuona, muhto vuotnaguolásteamis lea kultuvrralaš bealli ja gullá mearrasámekultuvrra ávnnaslaš vuđđui. Juste danne beroštage Norgga Sámiid Riikkasearvi sierranasat dákkár guolásteamis.

Máilmmi oaidnit ovttaláhkái
Riddoguolástuslávdegotti álbmotčoahkkimis Álttás ledje máŋga vuotnaguolásteaddji. Gažaldagat guolleresurssaid hálddašeamis ledje olu ja áššečuolmmat ledje earret eará dat ahte movt galgá oažžut kvohtaid ja movt galgá ruhtadit fatnasiid ja man váttis lea oažžut nuoraid guolástišgoahtit go leat dakkár ortnegat mat dál leat. Mii leimmet dadjat juo buohkat ovttaoaivilis. Snoranuohttefatnasat ja sáidenuohttefatnasat fal fertejit bissut vuotnarájá olggobealde ja dan deattuhedje olusat geat ledje boahtán čoahkkimii.

Mearrasámevuoigatvuođat gávdnojit
Lávdegoddi maid Carsten Smith jođiha galgá čielggadit ”sámiid ja earáid vuoigatvuođaid”. Norgga Sámiid Riikkasearvi lea álo leamaš dan oaivilis ahte mearrasámiin leat vuoigatvuođat ja lávdegotti mandáhtta, maid ráđđehus lea addán, orru cealkimin ahte lávdegotti bargu lea čielggadit earret eará dan ášši. Go lea sáhka vuoigatvuođaid hálddaseamis, de lea gis dat dakkár gažaldat mas ferte atnit prinsihppan ahte sii geat orrot lagamus resurssaid ja sorjet eanemusat resurssain galget beassat atnit ávkki resurssain. Leain áibbas vissis das ahte riddoguolástuslávdegotti čoahkkin Álttás váikkuhii bures lávdegotti bargui.

Čállá Norgga Sámiid Riikkasearvvi jođiheaddji Silje Karine Muotka lohkkiidreivves Altapostenis.

Dárogielveršuvdna