ROMSSA SÁMIID SEARVI-NSR SIHTÁ OVDÁNAHTTIT NUORAIDSKUVLLA SÁMEGIELOAHPAHUSA ROMSSAS

Romssa Sámii Searvvi-NSR stivra buvttii 2006 čavčča čuovvovaš cealkámuša Romssa suohkana nuoraidskuvllaid sámegieloahpahussii.

Romssa Sámiid Searvi oaidná dárbbu nannet Romssa suohkana nuoraidskuvlla sámegieloahpahusa, ja evttoha ahte Romssa suohkan nammada Sommerlyst nuoraidskuvlla sámegieloahpahusa ressursaskuvlan. Lea lunddolaš ahte Romssa suohkan álggaha ovdánahttinbarggu dán olis, ja váldá fárrui sámi váhnemiid, sámegieloahpaheddjiid ja eará pedagogalaš gealbbu dán bargui.

Nuorat geain lea sámegiella vuosttašgiellan ja nuorat geain lea sámegiella nubbegiellan dábbašit nannoseappot sámegieloahpahusa. Lea maid dárbu oahpahišgoahtit sámi fáttáid buot ohppiide buot fágain – ja lea eambbo go dat mii dál oahpahuvvo. Lea dárbu fállat oahpaheddjiide dárbbašlaš lassioahpu, ovdamearkka dihte heivehit sin dili vai sii sáhttet čuovvut Sámegiela kulturmáhtolašvuođa lávdaduvvon oahpu man Romssa universitehta lassi- ja joatkaoahpuovttadat (U-Vett) lágida.

Romssa Sámiid Searvvi-NSR mielas lea lunddolaš dán oktavuođas rámidit Romssa suohkana go lea ásahan buori sámegieloahpahusa mánáidskuvllas, erenoamážit Báhpajávrri skuvllas ja ulbmillaččat bargan dan nammii ahte mánáidskuvllaid sámegieloahpahus šattašii buorre. Dál lea sávvat ahte suohkan sáhttá álggahit seammá buori barggu nuoraidskuvlla sámegieloahpahusa ektui.