Sámedikki nammadan ekspeartalávdegoddi lea guorahallamin Sámedikki válgastruktuvra. Ekspeartalávdegoddi árvvoštallá galgá go rievdadit biiriid sturrodagaid ja galle mandáhta galget válljejuvvot juohke biires. Lávdegoddi lea gárvvisteamen barggu cuoŋománus 2007.

Davvi-Nordlánda Sámedikkis
Davvi-Nordlánddas leat 3 áirasa Sámedikkis. Nu leatge buot eará 12 válgabiiriin maid. Davvi-Nordlándda áirasat leat bargan dehálaš barggu ja fuomášuhttán Davvi-Nordlándda Sámedikki áššelisttuin. Das leat boahtán bohtosat sihke giellaseailluhanbargui, kultuvrii ja ealáhusaide válgabiires. Sámediggevuogádat lea juolludan ekonomalaš doarjaga máŋggáid buriid doaimmaide válgabiires ja leat šaddan máŋga bargosaji.

Mii dáhpáhuvvá Davvi-Nordlándda válgabiiriin?
Ekspeartalávdegoddi galgá sierranasat árvvoštallat maid berre dahkat unnimus válgabiiriiguin, eandalit Davvi-Nordlándda ja Lulli-Romssa válgabiiriiguin. Davvi-Nordlándda válgabiire lea buot unnimus, ii fal geográfalaččat muhto go lohká gallis leat jienastuslogus. Davvi-Nordlándda válgabiires leat measta beali unnit olbmot čálihan jienastuslohkui go nubbin unnimus válgabiiriin Gaska-Nordlánda ja Lulli-Romsa.

Ekspeartalávdegoddi cealká ahte lea jienasteddjiid logu duohken unniduvvo go válgabiire áiraslohku Sámediggái. Válgabiire sáhttá maid sihkkojuvvot áibbas. Válgabiire sámediggeáirasat oaivvildit ahte dát lea váivi danne go olbmuin lea dárbu láddat. Ádjána ovdal go olbmot dovdet ahte Sámediggi lea orgána mii lea dehálaš maiddái dán guovllu álbmogii. Mii leat vásihan ahte Viesterállasis-Lufuohtas lassánedje olbmot sámi jienastuslohkui ovdalaš mannan válgga.

Bohtosa sáhttá váikkuhit
Davvi-Nordlándda sámediggeáirasiid mielas lea dehálaš fuomášuhttit buot válgabiire ássiide ahte sis lea DÁL vejolašvuohta váikkuhit prosessii. Jos válgabiire galgá bissut sierra válgabiiren, de mii fertet dál juo garrasit áŋgiruššat vai sámi jienastuslohkui lassánit olbmot.
Sierra eavttut leat go galgá registreret sámi jienastuslohkui. Nubbi lea objektiivalaš giellaeaktu mas ovtta máttarváhnemis galgá leat leamaš sámegiella ruovttugiellan. Nubbi lea subjektiivalaš eaktu mas son guhte registrere iežas galgá atnit iežas sápmážžan – dahje identifiseret sápmelažžan.

Čálit sámi jienastuslohkui DÁL
Mii ávžžuhit dál dakkaviđe registreret sámi jienastuslohkui. Registreren lea dehálaš maiddái maŋŋá go ekspeartalávdegoddi lea geigen čielggadusbarggus, muhto de ii sáhte šat váikkuhit mo válgabiiriin manná.