Keskitalo vuordá ahte váilevaš bohtosat heiveamis boazologu guohtumiidda Finnmárkkus, ja dát ođđa dutkan, mielddisbuktet ahte Ráđđehus 2007s ovddida dakkár boazodoallolága mii formálalaččat addá ealáhussii dohkálaš váikkuhanfámu boazodollui guoski áššiin.

- Earret eará lea boazodoalu dárbu oažžut váikkuhanfámu dagahan ahte Sámediggi lea gáibidan ahte ođđa boazodoalloláhka galgá gustot daid ráddjemiiguin mat čuvvot ILO-konvenšuvnna nr 169 eamiálbmogiid ja čearddalaš álbmogiid hárrái iešmearrideaddji riikkain. Mun oaivvildan ahte ollu hástalusaid mat dál leat boazodoalus, sáhttá čoavdit jos Ráđđehus čuovvola Sámedikki mearrádusa boazodoalloláhkaáššis, dadjá Sámedikki presideanta Aili Keskitalo.

Dál lea gieskat almmuhuvvon raporta mas árvvoštallojuvvo proseassa boazologu heiveheami hárrái Oarje-Finnmárkkus. Raporta konkludere ahte Boazodoallostivrra 2002 mearrádus ahte juksat alimus boazologu 64.300 ovdal cuoŋománu 1. b. 2005, ii leat lihkostuvvan. Dát boahtá earret eará das go boazodoalu árbevirolaš máhttu unnán lea beassan váikkuhit mearrádusa.

- Sámediggi lea eatnat gerddiid čujuhan dasa ahte boazodoalu orgánat, eaige dušše Norgga eiseválddit, dat fertejit čoavdit boazodoalu siskkáldas áššiid. Dat lea deaŧalaš mearrádusaid ja bohtosiid lobálašvuhtii. Boazologu heiveheami oktavuođas fertet konstateret ahte ii proseassa iige boađus leat dohkálaš. Norgga eiseválddit eai leat nagodan ásahit oktasaš áddejumi boazodolliiguin váttisvuođaid eaige čovdosiid hárrái, dadjá Keskitalo.