Sámedikki buseahttamearrádusa vuođul orru dego juolludus fondii livččii unniduvvon 2,6 miljon ruvnnuin. Dat ii leat dattetge riekta.

- Mii leat foandda rámmas juolludan 500.000 ruvnno Sámi ovddidanfoandda evalueremii, oaidnin dihte olahitgo mii foandda mihttomeriid. Foandda mihttomearrin lea váikkuhit bargosajiid ásaheami sámi guovlluin ja dieinna lágiin láhčit dilálašvuođaid bissovaš ássamii sámi guovlluin. Lea hui deaŧalaš juste dál dan árvvoštallat, dadjá ráđđelahttu Jarle Jonassen.

Dasa lassin lea bušeahtas vuhtii váldojuvvon váilevaš juolludusat Interreg-prográmmaide maidda Sámediggi searvá. Dát juolludusat leat ovdal addojuvvon reviderejuvvon stáhtabušeahta bokte, ja danne eai leat váldojuvvon mielde dán jagáš Sámedikki dábálaš bušeahtas. Dát lea 2,1 miljon ruvnno unnit 2006 reviderejuvvon bušeahta ektui. Oktiibuot addá dát dakkár gova ahte ovddidanfoandda rámma lea unniduvvon 2,6 miljon ruvnnuin.

- Danne ii leat riekta ahte foandda rámmat leat unniduvvon. Mii geavahit muhtun ruđaid foandaortnega analyseremii ja evalueremii, ja rehkenastit ahte Ráđđehus juolluda Interreg-ruđaid reviderejuvvon bušeahtas jos ain leš sávaldat ahte Sámediggi galgá searvat Interreg-bargui, dadjá Jonassen loahpas.  

(Gáldu: Sámedikki preassadieđáhus)

Jarle Jonassen, Sámediggeráđđelahttu  Tlf. 78 47 40 00 / 975 81 637