Eamiálbmogat marginaliserejuvvon
Muotka cealká ahte eamiálbmogat oalle dávjá ellet váttis diliin ja leat marginaliserejuvvon. Máŋggaid sajiin leat šaddan guođđit álgoeatnamiid. – Eamiálbmogat šaddet eambbo go earát gierdat systemáhalaš veagalváldimiid, ja go roassu deaivida, de gillájit eamiálbmogat buot eanemus. Danne lea dát duohta skandála go sierranasat merkejuvvon ruđat eai oba ollege daidda geaidda livčče galgan ollet. Dán lea NUPI-guorahallan gieskat almmustahttán.

Eamiálbmogat fertejit searvat geafes riikkaid ovddidanbargui
Muotka oaivvilda ahte ferte váldit eamiálbmogiid fárrui geafes riikkaid ovddidanbarggu proseassaide. Go eamiálbmotperspektiiva boahtá mielde fágabargui, de leat eambbo luohtehahtti ahte geafes riikkaid ovddidanbargu olle eamiálbmogiidda. – Danne leage Geafes riikkaid ovddidanbarggu eamiálbmotforum dehálaš. Foruma barggu berre viiddidit. Forumas deaivvadit ruhtajuolludeaddji eiseválddit ja eamiálbmogiid ovddasteaddjit. Romssa universitehta hálddaša foruma. Olgoriikkadepartemeanta ja Geafes riikkaid ovddidanbargoorganisašuvnnat berrejit dán fuomášit.

Sámit sáhttet searvat
Norgga Sámiid Riikkasearvvi jođiheaddji cealká váttisin go ruhta, mii livččii galgan mannat Latin-Amerihká ja Asia geafes eamiálbmogiidda, baicce lea geavahuvvon Balkan huksemiidda ja Máttá-Asia prošeavttaide. – Sámiid bealis mii fertet bagat dáinná áššiin, joatká Muotka, ja oaivvilda sámit sáhttet leat veahkkin geafes riikkaid systemáhtalaš ovddidanbarggus mii dahkkojuvvo máilmmi eamiálbmogiid ovddas.

Sámiin lea buorre gealbu ja dat sáhttá leat mávssolaš dán oktavuođas, cealká Muotka, ja muittuha ahte Ole Henrik Magga lei ON bissovaš eamiálbmotforuma vuosttaš jođiheaddji, ja dasto maid sullii 370 milljun olbmo jođiheaddji miehtá máilmmi, - olbmot geat adnojuvvojit eamiálbmogin. Sámit leat maid bargan vai ON Eamiálbmotjulggáštus mearriduvvošii. Dát lea áddjás bargu mii lea ádjánan 24 juo jagi. Mannan vahkus dađibahábut bisánii dát bargu. Julggášus livččii sáhttán addit miehtá máilmmi eamiálbmogiidda buoret suoji ja vejolašvuođa dohkkehuvvot sierra álbmogin, iešmearridanvuoigatvuođa, giellalaš vuoigatvuođaid ja našunalitehtavuoigatvuođaid. Vuoigatvuohta eallit friddjavuođas, ráfis ja sihkárvuođas sierra álbmogin lea fárus. Danne livččii dehálaš ahte julggáštus mearriduvvošii. Duođalaš veagalváldimat, olmmošgoddimat ja eamiálbmotmánáid eretrivven leat duođalaš áššit mat leat fárus julggáštusas.

NUPI lea geahčadan geafes riikkaid eamiálbmogiid ovddidanbarggu maid Norga lea bargan mannan čieža jagi. Geafes riikkaid eamiálbmogiid ovddidanbargu lea unnit go dan mii lea muitaluvvon álbmogii. Raporttas boahtá ovdan ahte álbmogat leat boastut kategoriserejuvvon ja ahte dokumentašuvdna váilo. Váttis lea kártet masa geafes riikkaid ovddidanbargoruđat obalohkái leat geavahuvvon – leat go eamiálbmogiidda geavahuvvon vai eará doaimmaide. 81 proseanta ruđain mat livčče galgan mannat eamiálbmogiidda, leat geavahuvvon prošeavttaide maidda dutkit eai leat gávdnan dokumentašuvnna dahje ahte gávdnon dokumentašuvnnas ii čuoččo eamiálbmogiid birra obanassiige.

Norgga Sámiid Riikkasearvvi jođiheaddji, Silje Karine Muotka, tlf. 78450401 dahje 98487576