Sáhkavuorru Gollegiella-bálkkašumi juohkimis 2006

Stáhtaráđit, guossit ja bálkkašumi vuoiti guovttos.

Lihku buohkaide, muhto erenoamážit sávvat lihku Harald Gaskii ja Jouni Moshnikoffii. Dán jagi bálkkašumi vuoiti guovttos leaba máŋgga láhkai sámi ja riikkaidgaskasaš giellabarggu áivanat. Soai goappašagat leaba máŋga logijagi iežaska gelbbolašvuođain bargan áŋgirit sámegiela nannemiin, ja eaba leat goassige vuollánan. Ja goappašagat leaba leamaš deaŧalaš eavttuid biddjin sámi giellaovddideamis. Go bargá gielain, de ferte duostat bargat guhkes áiggi perspektiivvain. Dakkár perspektiivvain mii manná guhkkeleabbui go dan mii lea dábálaš go bargat prošeavttaiguin áiggis áigái. Guhkkeleabbui go du iežat karriera ollá. Go mii bargat sámegiela nannemiin, de fertet mii duostat geahččat meaddel min iežamet sohkabuolvvaid. Dán jagáš giellabálkkašumi vuoiti guovttos leaba čájehan dan.

Easkka dalle go mii duostat geahččat albmeravdda badjel, ja easkka dalle go mii duostat geahččat maŋosguvlui daid várrečohkaid duohkai mat leat báhcán, de mii áddegoahtit daid doaibmabijuid mearkkašumi maiguin mii iešguhtege leat rahčan sámegiela oktavuođas. Beaivválaččat sáhttá leat ollu mii orru smávis ja ovttageardán, ja mas álohii ii leat nu stuorra mearkkašupmi. Muhto go mii čohkket daid ollugiid bargguid bohtosiid, geat leat bargat gielain, de dalle dovdat doaivaga badjáneamen váimmuineamet. Ja sáhttit dovdat oadjebasvuođa ja iešdovddu leavvamin dego dat livččii liekkas mii leavvá go coggat liegga biktasa.

Paulus Utsi lea dadjan ná:

Giella lea oadjebasvuohta, ja eatnigiella addá lihku vaikke gos dal leš olmmoš dán máilmmis. Ja áiggi mielde dat šaddá ain divraseabbon go dat jávkagoahtá.

Háliidan vel iežan bealis lasihit: ii mihkkege atte dakkár lihku, ii ge mihkkege leat divraseappot midjiide go aiddo dat váimmu giella maid olmmoš lea rahčan oažžut ruovttoluotta. Duhát giitu Harald Gaski ja Jouni Moshnikoffi guoktái. Giitu go leahppi válljen dákkár geainnu ja dákkár eallimiid, nu ahte mii earát ge beassat daid bohtosiid muosáhit ja dovdat gitta váimmuineamet. Ja sávan doai atnibeahtti dán bálkkašumi giittusin mis buohkain máŋgga jagi barggu ovddas, ja oalgguhussan joatkit dán deaŧalaš barggu ávkin sámegillii maiddái boahtteáiggis.

Sávan oktii vel lihku dán jagi Gollegiella-bálkkašumiin.

Giitu beroštumis.


Loga eanet
Ssámedikki neahttasiidduin dás.
Bargo- ja searvádahttindepartemeantta neahttasiidduin dás

Aili Keskitalo, tlf. 97129305 / 78474000 / 78484200 aili.keskitalo@samediggi.no