Ole Henrik Magga (59) lei vuosttaš presideanta Norgga Sámedikkis, jagi 1989 rájes 1997 rádjai, ja son lei maid ON:a bissovaš foruma vuosttaš jođiheaddji.

Magga lea leamaš professora suoma-ugrálaš gielain Oslo universitehtas, ja dál son bargá professoran Sámi allaskuvllas.

– Son lea bargan eamiálbmot vuoigatvuođaiguin sihke našonalaččat ja riikkaidgaskasaččat ja danne lea ánssášan oažžut Oslo Universitehta olmmošvuoigatvuođabálkkašumi – Lisl og Leo Eitingers nammasaš foanddas, muitala juryjođiheaddji, prorektor Haakon Breien Benestad Uniforum:ii.

(Gáldu: Sámedikki preassadieđáhus)