Finnmárkkukommišuvdna áigu geahčadit vuoigatvuođadilálašvuođaid Finnmárkkus

Geasset leat leamaš ságastallamat Finnmarken aviissas ja ášši lea leamaš sáhttá go vuovdit vuoigatvuođaid eret Finnmárkkus. Čilgejuvvon leat iešguđet vejolaš heajos boahtteáiggi dáhpáhusat – iige oktage leat čilgen mii ášši duođaid lea. Go Finnmárkkukommišuvdna nammaduvvo, de sii várra meannudit máŋggalágán áššiid. Várra sáhttá leat sáhka kollektiivvalaš vuoigatvuođain, dahje sáhka geavahanvuoigatvuođain. Kommišuvdna galgá maid meannudit eaiggátvuoigatvuođa.

Ii bala vuovdimis

Máŋgga politihkkára leat buktán cealkámušaid dán oktavuođas. Buohkat leat mahkáš “vuorrástuvvan”. Mun lohken Finnmarken aviissas odne ahte mun maid galggan leat vuorrástvvan dán áššis, ja dát lea áibbas ođas ášši munnjege. Mun in leat gohcimin ijaid ja vuorrástuvvamin goas dál vuovdigohtet Finnmárkku eatnamiid go Finnmárkkukommišuvdna boahtá. Dása leat máŋga buori ákka. Vuosttažettiin Finnmárkkukommišuvnnas galget leat čeahpes fágaolbmot. Nuppádassii jáhkán ahte dat áššit mat bohtet kommišuvnna ovdii, dat bohtet kommišuvnna ovdii juste danne go lea áigumus suddjet daid vuoigatvuođaid mat juo leat, iige danne go soamis lea áiguin “vuovdit” eret. Váttis áššit gal šaddet, ja dieđosge áddjás áššit. Mun gal oaivvildan ahte kommišuvnna bargu ja áššemeannudeapmi lea dakkár mas galgá geavahit fágalaš árvvoštallamiid, iige politihkalaš retorihka.

Dálá vuoigatvuođat nannejuvvojit

Dálá geavaheapmi ja dálá vuoigatvuođat nannejuvvojit earret eará kommišuvnna meannudeami bokte. Vuoigatvuođaeaiggádiin Finnmárkkus ii leat heajut vejolašvuohta go vuoigatvuođaeaiggádiin eará sajiin Norggas. Sis leat seammá vuoigatvuođat ja seammá vejolašvuođat bargat ja hommet go vuoigatvuođaoamasteddjiin eará sajiin Norggas. Eanaeaiggádat, geat dáidet oažžut nannaseappot riektesuoji eaiggátvuođavuoigavuođas Finnmárkkukommišuvnna bokte, sáhttet sihke vuovdit eatnamiid ja geavahit eatnamiid. Ahte mahkáš vuovdigohtet hirbmadit daid eatnamiid, dat ii leat duohta ášši. Dehálaš lea dál normaliseret riektedilálašvuođaid Finnmárkkus.