Várdobáiki kulturguovddáža ja Márkomeannu festivála bušeahttalasáhus 2006-bušeahtas boahtá das go dain leat duohta ja legitima dárbbut. Lasáhus lea dakkár man plána- ja finánsalávdegoddi evttohii dievasčoahkkimii ja man eanetlogujoavku doarjjui ovttajienalaččat. Dát lei postitiiva ja dárbbašlaš mearrádus sihke guvlui ja Sámediggái ollislaččat.

Ipmárdusa oččodit
Sámediggi lea vuhtii váldán ahte márkosámi ásahusain leamaš unnán ruhtadeapmi. Dán mii leat dušše muhtun muddui nagodan njulget maŋemus bušeahttamearrádusain, muhto dáinna lágiin Sámediggi buktá áddejumi ja legitimitehta álbmotválljejumi orgániii mii ferte váldit duođas gielalaččat marginaliserejuvvon guovlluid ja doarjut sin barggu njulget máŋga čuođi jagi dáruiduhttima vahágiid.

Ráhkadit lasihanplána
NSR jođihangoddi oaivvilda ahte dát ášši, ja maid eará áššit, čájehit ahte Sámediggi ja Sámediggeráđđi fertejit bargat dan ala ahte sámi ásahusat ja eará doaimmat ovdalgihtii sáhttet diehtit makkár ruhtadeami sii ožžot Sámedikki bušeahttapoasttaid bokte. Ásahusaide ja doaimmaide mat ožžot beare unnán ruhtadeami dárbbu ektui, nu mo márkosámi guovllut, ferte ráhkaduvvot lasihanplána vai ii čuožžil eahpesihkárvuohta ruhtadeami ektui.