Son válljejuvvui jođiheaddjin jagis 2003 ja dál, nuppi áigodagas, lei válljejuvvon jođiheaddjin gitta 2007, muhto lea áigon luohpat. Son lea dattege Riikkastivrras mielde danne go lea presideanta, nu go juo njuolggadusat čilgejit. Jođiheaddjis ii leat peršuvnnalaš sadjásaš, ja danne leat Riikkastivrras ja Bargolávdegottis dál okta áirras unnit.

Urheim doaibmá NSR jođiheaddjin

NSR organisatuvrralaš nubbejođiheaddji Martin Urheim (40) Romssas eret jođiha NSR gitta riikkačoahkkimii 2006, nu go njuolgadusat čilgejit. NSR bargolávdegottis leat dál Urheim ja politihkalaš nubbejođiheaddji Jarle Jonassen (58), guhte maiddái lea sámediggeráđis.

- Aili lea bargan hirbmat buori barggu organisašuvnna ovddas, Martin Urheim cealká. Son lea dássidit jođihan organisašuvnna ja čađahan rámiidanveara válgagičču. Dan ovddas mii leat hui giitevaččat. NSR beasai, nu go diehtimet, searvat Sámedikki jođiheapmái ain njeallje jagi. Mii leat duhtavaččat go son searvá Riikkastivrii presideantaámmaha oktavuođas, Urheim cealká. 

Heaika Skum váldočálli sadjásažžan 

Urheim vuosttaš bargun lea gártan gávdnat NSR váldočálli sadjásačča, guhte dáid beivviid manná virgelohpái. NSR bargolávdegoddi lea dahkan šiehtadusa Heaika N Skumain Guovdageainnus eret, guhte galgá bargat váldočálli sadjásažžan jagi. Heaika N Skum jođiha fitnodaga Sámipress, doaimmaha dulkon- ja jorgalanbargguid ja searvá Luonddugáhttenlihtu bargguide.

-Heaika Skum bokte nannejuvvo NSR čállingoddi, go sus lea sihke organisatuvrra bargohárjaneapmi ja gelbbolašvuohta, ja lea guovttegielat olmmoš, dadjá Urheim. – Mun lean ilus go son lea mieđihan váldit virggi. Mii leat ovdalaččas juo oahppan dovdat su buori barggu.

Ođđajagimánu álggus dearvvada NSR bargolávdegoddi ođđa váldočálliin Guovdageainnus plánet boahttevaš jagi doaimmaid, ja bargguid mat galget bargojuvvot ovdal riikkačoahkkima.

- Illudan ovttasbargat  váldočálliin ja ovdánahttit riikkastivrra, báikkálaš servviid, SOL ja sámediggejoavkku gaskavuođaid, ođđa NSR-jođiheaddji Martin Urheim loahpaha.

Gulahallanolbmot:         - Heaika N Skum, 99 36 52 57

                                   - Martin Urheim, 99 50 61 95