- Le luodjom láhkáj vájvve gå Divtasvuona suohkan ij oassálaste Nordlánda fylka sámekonferánsan Ájluovtan, Divtasvuonan. Sierraláhkáj gå konferánsan li ássje ma njuolgga guosski suohkanij: Divtasvuona suohkana oassálasstem sámegiela háldadusguovlluj, ja boahtte aktisasjbarggosjiehtadus Nordlánda fylkkasuohkana ja Sámedikke gaskan. Mij lip håjen gå mijá suohkan dán láhkáj ij sidá duosstot dajt hásstálusájt ma dá guovte ássjijs tjuovvu, javllá Sálto sámesiebrre-NSRa jådediddje Wenche A. Nergård.  

- Dájna doadjá oasev Divtasvuona sámeálmmuga vuodulasj almasjriektás

Sálto sámesiebrre-NSRa mielas le aj sierraláhkáj vájvve jus Divtasvuona suohkana oassálasstem sámegiela háldadusguovlluj mañeduvvá.

- Dát la alvos ássje ja la tjielggasit vuosstáj dajda ulmijda majt Ráddidus iesj la åvdedam háldadusguovlo vijdedime aktavuodan. Dájna Vuonarijkka aj doadjá oasev Divtasvuona sámeálmmuga vuodulasj almasjriektás, mij le bessat sámastit almmulasj aktijvuodaj. Stáhtta ij máhte doajmmaj biedjama ájggemierev rievddadit váni lagáp rádudallamij dagi Sámidikkijn ja dan guovlo guoskevasj sáme álmmugijn. Ep åvvå dåhkkida mañedimev, javllá Wenche A. Nergård.

Sálto sámesiebrre-NSR

Divtasvuona suohkan ja sámegiela háldadusguovllo

Sálto Sámesiebrre-NSR vuoset Gånågisá resolusjåvnå 17.06.05 mærrádussaj, man baktu Divtasvuona suohkan le sámegiela háldadusguovlo oassen 01.01.2006 rájes.  

Sivvan háldadusá guovlo vijdedibmáj Divtasvuona suohkanijn vuoset Kultur- ja Girkkodepartemennta:

• Vijdedibme vuolggá Vuonarijka sámepolitihkas ja guosská rijka doajmme lágajda ja rijkajgasskasasj sjiehtadusájda unneplågoj gielajt gáhttimij.
• Dåjmalasj ja ienep sámástibme le ájnas sáme kultuvra åvdedibmáj.
• Riektá sámástittjat ja åhpaduvvat ietjasa giellaj la akta dajs vuodulamos ja ájnnasamos riektájs ma li ásadum sáme álmmugij.

Tjoahkke rudálasj gålo gå háldadusguovlo vijdeduvvá Divtasvuona suohkanijn la suládaládum 4,5 – 5 mill. kråvnnåj (gehtja Ot.prp. nr. 38 2004-2005)).

Sálto Sámesiebrre-NSR vuoset dasi, ittjij Bondevik II-ráddidus, ittjij ga Stoltenberg-ráddidus oajvvada rudájt háldadusguovlo vijdedibmáj Divtasvuona suohkanijn 2006 stáhtabudsjehtan. Mielas. Dát la juoga mij hudjodahttá Sálto Sámesiebrre-NSRav, ållagasj gå Kulturdepartemennta Avisa Nordland nammasasj avijsan gætjájdallá doajmmajbiedjamav mañedit.

Jus doajmmajbiedjam ájggemierre rievddaduvvá la dat:

• Alvos ássje ja la tjielggasit vuosstáj dajda ulmijda majt Ráddidus iesj la åvdedam vijdedime aktavuodan.
• Vuonarijkka doadjá oasev Divtasvuona sáme álmmuga vuodulasj almasjriektás, mij la bessat sámástit almmulasj aktijvuodaj.

Sámegiella l ieme giella Divtasvuonan. Mij ep dåhkkida vijdedime doajmmaj biedjama ájggemierev rievddadit.

Sálto Sámesiebrre-NSR vuoset rádudallamsjiehtadussaj stáhtalasj oajválattjaj ja Sámedikke gaskan, dåhkkidum Gånågis resolusjåvnå baktu 01.07.2005, ja dættot stáhtta ij máhte doajmmaj biedjama ájggemierev rievddadit lagáp rádudallamij dagi Sámedikkijn ja dan guovlo guoskevasj sáme álmmugijn (gehtja sjiehtadusáv, tjuokkes 9).

Danen gájbbedip: Doajmmaj biedjama ájggemierre sámegiela háldadusguovlov vijdedit Divtasvuona suohkanijn, njuolgadusá 17.06.2005 milta, ij galga rievddaduvvat!

Avtajienalattjat mierredum Sálto Sámesiebrre-NSRa sebrulasjtjåhkanimen 16.11.2005

Wenche Nergård

Jådediddje