Ovddeš Ráđđehus lei evttohan su. 625 miljuvnna sámi doaimmaide 2006 bušehttii.. Dalá Sámediggepresideanta Sven-Roald Nystø celkkii dalle Bondevik-ráđđehusa bušeahttaevttohusa mearkkašit bisáneami, ja ahte ođđa ráđđehus ferte čájehit dáhttu servodatovdáneapmái. Ođđa ráđđehus ii leat stuorrát rievdadan Stádabušeahta sámi doaimmaid ektui, muhto kultuvrii ja mediai lasihuvvo ruhta ovddit ráđđehusa evttohusa ektui.  Stoltenberg-ráđđehus evttoha lasihit doarjaga sámi kultuvrra hárrái čieža miljon ruvnnuin. Maiddái sámi aviissaide evttohit lasihit doarjaga 200 000 ruvnnuin.

Ilus go sámi kultuvrra vuoruhit

- Mii leat ilus go Ráđđehus hálida vuoruhit sámi kultuvrra. Čieža miljon ruvnno eahpitkeahttá lokte sámi kultuvrra ja Sámedikkis lea dal vejolašvuohta ain nannoseabbo bargat kulturpolitihkain ovddasguvlui. Sámi aviissaide leat maid evttohan lasihit doarjaga mii galgá gokčat bálká- ja haddelasáhusa, ja dat lea maid buorre, muhto dat nappo ii leat

sámi preassa duohta nannen, dadjá ráđđelahttu Jarle Jonassen.

Goaridit sámgiela go guovttagielalašdoarjja ii lasihuvvo

Ráđđehus ii leat evttohan lasihit guovttegielalašvuođa doarjaga suohkaniidda mat gullet sámegiela hálddašanguvlui, ja dat mielddisbuktá ahte suohkanat Guovdageaidnu, Kárášjohka, Porsáŋgu, Deatnu, Unjárga ja Gáivuotna ožžot unnit doarjaga dál go Divttasvuona suohkan searvá ođđajagimánu 1. b. boahtte jagi. - Jus guovttegielalašvuođa doarjja ii lasihuvvo go Divttasvuona suohkan šaddá oassin hálddašanguovllus boahtte jagi rájes, de hedjona suohkaniid guovttegielalašvuođa doarjja. Dat goarida sámegiela dain guovlluin, vuorjašuvvá Jonassen.

Ain vuorddihit Nuorta-sámiid

Ráđđehus ii evttot ge doarjaga Njávddáma Nuorta-sámi Museai. Dasto šaddá fas maŋidit huksenplánaid. - Min mielas lea hui váidalahtti go Ráđđehus ii evttot doarjut Nuorta-sámi Musea huksema. Nuortasámit leat guhká vuordán dan rámi maid museahuksen mielddisbuvttášii ja mii sávvat ahte Stuoradiggi sáhttá oktii vel guorahallat ášši vai dat doaimmahivččii johtileabbo. Muhtunládje sáhttá dadjat ahte čieža miljon doarjaga illu sevnnjoda danin go nuortasámiid eai vuoruhuvvo, loahpaha Jonassen.