Sotnabeaivvi 23.10.05 sáddejuvvoi aiddo válljejuvvon Sámediggepresideanta Aili Keskitalo Davvi-Norgga universitehtabuohccevissui Romsii dan sivas go gurut giehta ii doaibman nu go galggašii. Guorahallamat čájehedje ahte Keskitalos leamaš vuoiŋŋašgáldnan.

Aili buori vuoimmis

Aili Keskitalo beasai bearjadaga ruoktot. Son lea vahkku vel buohccindieđuhuvvon, ja álgá bargui Sámediggepresideantan skábmamánu 7. beaivvi.  – Lean hui buori vuoimmis, ja illudan bargagoahtit fas boahtte vahkku, muitala Aili.

Aili Keskitalo muitala iežas ožžon sihke liđiid ja dearvvuođaid telefun ja SMS bokte go lei buohcceviesus. – Mun giittán buohkaid geat leat čájehan beroštumi munnje dán oktavuođas. Dat lea duođai liggen mu, dadjá Aili.