NSR sámediggejoavkku parlamentáralaš jođihanjoavkkus leat jođiheaddji, nubbinjođiheaddji ja lahttu. Parlamentáralaš jođiheaddji lea maid NSR riikkastivrra lahttu, ja lea son guhte dikšu sámediggejoavkku ja riikkastivrra gaskavuođaid.

Dehálaš dikšut gaskavuođaid

Ođđa parlamentáralaš jođiheaddji Jánoš Trosten dadjá dehálažžan dikšut NSR siskkáldas gaskavuođaid, sihke siskkáldasat sámediggejoavkkus ja organisašuvnna iešguhtet osiid/beliid gaskavuođaid. Son dadjá parlamentáralaš jođiheaddji bargun láhčit dilálašvuođa vai juohke áirras dovdá oadjebasvuođa joavkkus, ja bearráigeahččat ahte dieđut ollejit juohke áirasii. Son deattuha parlamentáralaš jođiheami leat joavkku ovddasvástádussan. – Mii áigut siskkáldasat juohkit bargguid vai min ollislaš gelbbolaš­vuohta boahtá atnui, dadjá Jánoš Trosten. Trosten dadjá áibbas dehálažžan buori bargodilálašvuođa doalahit joavkkus ja bissut čoahkis Sámedikkis.

Njealje gelddolaš ja hástaleaddji jagi

Parlamentáralaš nubbinjođiheaddji Ann Mari Thomassen giitá luohttámuša ovddas go NSR sámediggejoavku lea su válljen parlamentáralaš jođihanjovkui. – Jáhkán vásihit njeallje gelddolaš ja hástaleaddji jagi ja illudan bargagoahtit, dadjá Thomassen. Son dadjá stuora ášši boahtimin dán áigodagas. – Erenoamážit namuhan sámi vuoigat­vuođalávdegotti barggu Romssas, Nordlánddas ja máttasámeguovllus. Doaivvun oažžut dakkár čovdosiid mat leat seammá buorit go Finnmárkoláhka, dadjá Ann Mari Thomassen.

Rita-Alise Porsanger maid giittá joavkku luohttámuša ovddas ja illuda njealje gelddolaš jagiide mas doaivu oahppat olu.