Vaikko nissonolbmuid dilli internašunáladit lea buorránan maŋemus moaddelotjagi, de leat ain olu hástalusat. Leat nissonolbmot mat eanemusat guddet mailmmi geafivuođa ja vearrivuođa noađi. Dán jagáš TV-ákšuvdna bidjá fokusa veahkaválddálašvuhtii nisoonolbmuid vuostá. ON lea cealkán ahte veahkaválddálašvuohta nissonolbmuid vuostá lea okta dain stuorimus olmmošvuoigatvuođaid loavkadusain. Nu ollugat go juohke goalmmat nissonolmmoš vásiha veahkaválddalašvuođa eallingearddistis Internašunála organisašuvnnat, nu go ON, deattuhit dehálažžan buoridit nissonolbmuid dilálašvuođaid. Dat lea eaktun ekonomálaš ja sosiala ovdáneapmái.

Doarjjo olmmošvuoigatvuođai ja dásservvu rahčamušaid

- Ahte doarjut olmmošvuoigatvuođaid rahčamušaid álo leamaš guovddážis NSRii, ja danin mii doarjut ge TV-akšuvnna cealká Jánoš Trosten. Son dadjá ahte buoridit nssonolbmuid dili servvodagas lea mearrideadji jus galgá ovdánit. TV-áksuvdna lea dehálaš olmmošvuoigatvuođat rahčamušaide, ja maid dásseárvvu rahčamušaide.

Son čujuha dasa ahte erenoamážit olu eamiálbmogat nissonolbmot ellet vártnuhisvuođas. – Globálalaččat leat eamiálbmogat geafimusaid searvvis, ja leat erenoamážit nissonolbmot mat guddet dán noađi, dadjá Trosten. Son sávvá ahte TV-ákšuvnna fokus nissonolbmuide maid buoridivčče eamiálbmotnissonolbmuid dilálašvuođaid.

Dárbbašit ruhtačoaggiid

NSR sámediggejoavku doarju TV-ákšuvnna 5000,- ruvnnuin. – Mii ávžžuhat sámi álbmoga maid doarjut ákšuvnna ruđalaččat. TV-ákšuvdna maid dárbbaša ruhtačoaggiid, ja NSR sámediggejoavku ávzzuha olbmuid searvat ruhtačoaggin ja bidjat návccaid vuosttildit veahkaválddálašvuođa nissonolbmuid ektui.

Eanet dieđuid TV-ákšuvnna birra gávnnat dán linkkas: http://www.nrk.no/tvaksjonen/

Searvva ruhtačoaggin: http://www.nrk.no/programmer/tv/tv_aksjonen2005/4892580.html