Oslo Sámiid Searvi lea máŋggaid jagiid máksán láiggu ja divššu sámi dáiddara John Savio hávddi ovddas Vestre Gravlundas Oslos. John Andreas Savio (1902 – 1938) atnojuvvo okta deháleapmos sámi dáiddáriin. Savio bajasšattai Buođggáin Finnmárkkus, ja jámii Osloi 1938:is geahpesdávddas, 36 jagi boarisin.

Čalmmustedje Savio hávddi

Ingrid Jåma muitala ahte Oslo Sámiid Searvi 70-logus bargagođii oččodit muitobázzi John Savio hávdái, mii dalle ii oba lean ge merkejuvvon. – Duogaš dasa ahte álggaheimmet dán lei ahte Oslo Sámiid Searvvis hálideimmet ahte stuorra dáiddara hávdi galggai čalmmustuvvot, čilge OSS-jođiheaddji Jåma. Dalle biddjui hávdde ala geađgi mas lea latnjagovva bronssas maid nubbi dovddus sámi dáiddár, Iver Jåks, lea ráhkadan. – Dát hávdebázzi atnojuvvo okta dain deháleapmos bargguin Jåksa dáidagis dien áigodagas, dadjá Ingrid Jåma

Hálidit gudnejahttit Savio

Ingrid Jåma čujuha dasa ahte dáiddaris John Savios lea stuorra našunálalaš mearkkašupmi. – Son lea okta  dain beakkáneamos sámi dáiddariin, ja mii hálidat ahte Savio gudnejahttojuvvo dan bokte ahte su hávdi loktejuvvo našunála ovddasvástádussan, ii ge dušše leat báikkálaš beroštupmi dasa, dadjá Jåma. Sii evttohit danin ahte Sámediggi váldá badjelasas goluid John Savio hávddi láigui ja dikšumii. – Berre leat ovddasvástádus našunála sámi kulturmuitoeiseváldiide, loahpaha Ingrid Jåma.