NSRas leat dál 17 áirasa Sámedikkis, oktain Christina Henriksena eahpesihkkaris liigemándahtta Várjjagis. Dán mandáhtta doalahit jus válgaoasalastin Lulli-Norggas lea vuollel 55 %. Bargiidbellodagas leat maid 17 áirasa. Lassin leat dál siste 6 áirasa smávitlisttuin.

Politihkkálaš vuođđu ovttasbargat

NSRa presideantavettohasas Aili Keskitalo lea stuorra doaivva dasa ahte NSR nagoda cegget eanetlogu ja beassá ain stivret Sámedikki. –Mii leat dahkan hui buori válgga, ja dat mearkkaša ahte jienasteaddjit leat midjjide addán ođđa luohttámuša, čujuha Keskitalo. Son dadjá ahte šaddet gelddolaš šiehtadallamat ovddasguvllui. – Leat buorit vejolašvuođat hukset oktasaš politihkkálaš vuođu smávit listtuiguin ođđa Sámedikkis, oaivvilda Aili Keskitalo

Skándalalohkan

Aili Keskitalo moiatá garrasit sámediggeválggaid jienaid lohkama. – Dál vuorddašit bohtosiid válgabiire 13 Lulli-Norggas ja orro leamen nu ahte mii fertet ain vuordit, dadjá Aili. Vahkku maŋŋel válggaid ledje ain 30-35 suohkana Lulli-Norggas mat eai leat sádde jienaid ja válgaprotokolla Lulli-Norgga lohkanválgastivrii.

– Dát ii leat dohkkálaš, dadjá Aili Keskitalo. – Sámediggeválggat eai leat unnánat dehálačča go eará válggat, ja danin oaivvildan ahte lea skándala ahte sámediggeválgga jienat leat skuffaide vajálduvvon.

Aili Keskitalo oaivvilda ahte dál leai áigi áigá jo dievvan buoridit válgaordnega. Dál lea viđat geardde go lágiduvvo Sámediggeválga Norggas, ja ain fertejit sámepolitihkkárat ja jienasteaddjit vuordit vaikko man guhkká bohtosiid. – Ii leat dohkkálaš ahte go ii dahkko mihkkege dáinna go juohke válggaid oktavuođas vásihit dán, dadjá Aili. – Mun balan ahte olbmot sáhttet massit beroštumi sámediggeválggaide dán geažil ja ahte válgaoasálasttin de maid sáhttá njiedjat.

Lea Gieldda- ja regionaldepartemantra geas ovddasvástádus sámediggeválgaordneggi, ja Sámediggi lea dáhttun departemeantta rievdadit nu ahte jienat lohkkojit jođaneabbo. – Dáinna ferte departemeantta dál bargagoahtit, dadjá Aili Keskitalo.

 Áirasat

* eahpesihkkaris liigemándahtta/ usikkert utjevningsmandat