Buorit Sámediggejienasteaddjit

Sámedikki ásahemiin 16 jagi dassái rievddai Norga stáhta mahkáš ovtta álbmoga stáhtan šaddat guovtti álbmoga stáhtan, danne go dohkkehuvvui ahte stáhta rájaid siskkobealde leat guokte álbmoga leamaš álggu rájes. Dan rájes leat stáhta orgánat ja gonagas átnon ándagassii sámi álbmogis daid vahágiid ovddas maid dáruiduhttin lea dagahan.

Sii leat maid dohkkehan ahte Norga lea vuođđuduvvon guovtti álbmoga eatnamiidda, dáččaid ja sámiid. Norgga Stuoradiggi lea duohta daguid bokte čájehan dáid leat eambbo go dušše čáppa sátnin. Finnmárkkulága meannudeames čájehedje dan, go šiehtadallagohte Sámedikkiin. Dakko bokte lea Norgga nášuvdna njulgegoahtán guhkes áiggi badjelgeahččama sámi álbmoga guovdu.

Mii NSRs leat leamaš guovddážis dán ovdáneamis, ja mii leat movtta go sámi servodat oažžu seammá ovdánanvejolašvuođaid stáhtarájaid siskkobealde. Muhto, máŋga sápmelačča ain vásihit ahte olu lea dagakeahttá, sihke sámegiela ealáskahttimis ja oadjebasvuođadovddu ektui go dovddasta sápmelašvuođa – nanus sámi identitehta ektui.

Mii NSRs dáhkidit ahte ain áigut ovddidit sámi servodaga dárbbuid. Mii leat earret earret cealkán ahte dál lea áigi rahpat Sámefoandda ja dainna ovddidit sámegiela ja nannet sámi kultuvrra, erenoamážit guovlluin mat leat garrasit gillán dáruiduhttima geažil.

Mii áigut ealás sámi servodagaid ja mis leat ođđaáigasaš Sámi višuvnnat mas Sámediggi lea nu friddja ja sorjakeahttá go vejolaš. Mii NSRs sihtat Sámedikki šaddat mearrideaddjin dakkár áššiin mat gusket sámi álbmogii. Vai Sámediggi bisošii friddja iešheanalis orgánan, de NSR áigu šiehtadallanprinsihpa gustot maiddái Sámedikki ruđalaš dili šiehtadeapmái ja guolástusvuoigatvuođaide. Sámedikkis galgá maid leat vejolašvuohta ovddidit láhkaárvalusaid Stuoradiggái go leat áššit mat gusket sámi álbmogii.

Go jienastat NSR, de leat fárus sihkkarastimin sámi servodaga odáneami vai sápmelaččat leat seamma árvosaččat go earát, ii unnit ii ge eanet.

Buorit válggat.

Aili Keskitalo

Norgga Sámiid Riikkasearvvi presideantaevttohas