Čállán: Gunn-Britt Retter,

NSR/SáB 1. evttohas sámediggeválggaide Várjjagis

Muittán ieš dalle nuorran go serven aktiivvalaččat friddjavaláštallamiidda. Ollesolmmožin lean joatkán organiseret valáštallamiid báikkálaš dásis. Sámi valáštallanbarggus lea gelddolaš boahtteáigi. Áiggun sámediggeáirrasin bargat govda valáštallanfálaldagaid ovddas sámi servodagain. Nanus sámi valáštallan lea dehálaš identitehtahábmejeaddji doaibma sámi nuoraide, ja nanne oktasaš árvvuid ja noarpmaid. Dehálaččat leat dat deaivvadanbáikkit main sámenuorat miehtá Sámi deaivvadit, valáštallet ja gilvvohallet. Várjjat Sámeálbmot Lihtu NSR/SáB njunuševttohassan hálidan bargat dan ovdii ahte sámi valáštallan- ja nuoraidorganisašuvnnat ožžot vejolašvuođa bargat oktasaš sámi valáštallamiin ja valáštallanfágalaš gažaldagaiguin.

Kártenbargu

Norgga Sámiid Riikkasearvi (NSR) lea dán sámediggeáigodagas váikkuhan ovdaprošeavtta čađaheapmái, mas sámi njoarostanarenat ja heargegilvoarenat Finnmárkkus leat guorahallojuvvon. Sámi valáštallama oppalaš kárten lea čađahuvvon ovttas SVL-N ja SVL rikkaidgaskasaš lávdegottiin ja dan barggu vuođul sáhttá joatkit sámi valáštallama ovdánahttinbargguid. Sámediggi lea oččodan sámi valáštallamiidda tihppenruđaid..

Ovdánahttinvejolašvuođat

Boahtte sámediggeáigodagas fertešii farggamusat ráhkadit valáštallandieđáhusa mii čilge sámi valáštallama riikkarájain sorjakeahttá. Sámedikki dieđáhusa ferte čuovvolit doaibmaplánain mas buori doaimmaid vuoruha ovttas sámi valáštalliiguin. Heargegilvvohallit doalahit árbevieru mii lea buot eamiálbmogiin Arktalaš guovllus, ja danne áiggun doarjut heargegilvvuid sierra sámi valáštallansuorgin. Geasse- ja dálvevaláštallamat mat lágiduvvojit riikkarájain sorjakeahttá lea dehálaččat sámi valáštallama ovdánahttimii. Sámepolitihkalaš rahčamuš dárbbašuvvo vai ásahuvvojit sámi nášunála čuoiganarenat ja heargegilvvohallanbáikkit. Valáštallanhállaid hukset báikegottiide, lea maid boahtteáigge višuvdna. Gelddolaš lea maid gullat go 20 sámi nuora besset searvat Arctic Winter Gamesaide.

Dovddan maid čielgasit man dehálaš lea guottuid rievdadit rasmismma ektui valáštallamis. Sámediggi lea dakkár aktevra gii berre leat mielde plánemin maiddái doaimmaid rasismma vuostá valáštalliiguin ovttas.

Váldde oktavuođa Gunn-Britt Retteriin, giehtatlf. 913 59 222

Gunn-Britt Retter preassagovva: http://www.nsr.no/Files/Kandidater/Gunn%20Britt%20Retter.jpg

Gunn-Britt Rette portreahttjearahallanr: http://www.nsr.no/website.aspx?objectid=1&displayid=9303

Eambbo Norgga Sámiid Riikkasearvvi (NSR) birra nsr.no