Sámi boaresolbmuin lea váttis ja amas dilli. – Politihkkárat leat viimmat hállagoahtán kulturáddejumi birra boaresolbmuid divššus. Earret eará leat minoritehtapolitihkkár ja stuorradiggeáirras Afshan Rafiq (H) lokten dan sága, ja Saera Khan (AP) oktan Mustafa Unsalain (H).
Sámi vuorrasiidda galgá buorre fálaldat boarásmanbeaivái
– Minoritehtat Norggas vásihit váttis ja amas dili go šaddet boaresolbmuid dikšui, muhto sápmelaččat maid vásihit dan seammá, Rita-Alise Porsanger (NSR) dadjá. Son lea sámediggeválggaide gilvaleamen Mátta-Norggas, ja oaivvilda ahte boares sápmelaččat sierraláhkai deivet váttisvuođaid boaresolbmuidfuolahusas. – Sámit leat eamiálbmot, eai ge oaččo heivehuvvon fálaldagat dáčča boaresolbmofuolahusas.
– Mun siđan heivehuvvon fálaldaga sámi boaresolbmuide Mátta-Norggas. Sámit lassánit Mátta-Norgii, ja dat ferte váikkuhit daidda suohkaniidda mas sámit orrot. Sámediggeáirrasin áiggun bargat dan bearrái ahte sámiide, geat orrot Mátta-Norggas, galgá láhččojuvvot buorre fálaldat boarásmanbeaivvi. Son čujuha suohkana ovddasvástádussii. Suohkan berre oahpahit dearvvašvuođabargiide sámegiela ja sámi kultuvrra birra.
Smávva lávkkiin lea maid ávki
- Ovdamearkka dihte čuohcá deameantadávda dan láhkái ahte manaha buot gielaid maid lea oahppan ollesolmmožin. Porsanger čujuha dasa ahte dearvvašvuođadivššárat berrejit áddet dan maid sámi boaresolmmoš dadjá, ja vaikkeba dulkka skáhppot vai beassá gulahallat sámi pasieanttain. Porsangeris lea alddis dearvvašvuođaoahppu, ja dadjá smávva lávkkiin maid leat ávki. – Jos mat boaresolbmo veahkeha bidjat tv ovddabeallái dii 17.10 vai beassá eatnigielasset gullat sámi TV-ođđasiid bokte, de dat lea goittot buoret go ii mihkkege!
Sámi dearvvašvuođabálvalusat ovdánit
- Mun siđan ahte sámi boarrásat, geat orrot eará sajiin go guovddáš sámi guovlluin, galget oažžut divššu dearvvašvuođabargiin geat dovdet sámi kultuvrra. Álggos fertet geahččaladdat ja oahppat, ja de fertet maid lasihit dutkama dáid fáttáin. Fágalaš resurssat ja neahttasiiddut main dearvvašvuođbargit sáhttet eambbo oahppat, livčče buorit. Sámiide, geat orrot eará sajis go guovddáš sámi guovlluin ferte fállat fuolahusa. Sámediggi ja eará fágalaš orgánat mat dál ásahuvvojit, fertejit váldit ovddasvástádusa ja duođalaččat bargat vai sámi boarrásiidda fállojuvvo kvalitehtalaččat buorre fálaldat, Rita-Alise Porsanger (NSR) loahpaha.