Lemet-Jon Odd Ivvár lei okta dain váhnemiin gii oččodii mánáidasas dan fálaldaga mii dáčča mánáide lea diehttelas; namalassii skuvla- ja mánáidgárdefálaldat eatnigillii. – Min sámi mánáidgárdi lei vissa vuosttaš sámi mánáidgárdi mii obanassiige ásahuvvui. Álgoálggus ledje sullii 6-7 máná, Odd Ivvár muitala. – Ii lean beare álggahit, ii Deanuleagisge, vaikko measta buohkain lei sámegiella eatnigiellan.

Mánáidgárdepolitihkka váilui

- Suohkanis ii lean báljo suohkanmánáidgárddiidege makkárge politihkka, iige heađisge sámi mánáidgárdepolitihkka dan áiggi. Dilli lei rievtti mielde váttis gitta dassá go Sámediggi ásahuvvui. Juohke jagi ražaimet oažžut ruđa min bargui, ja gal dás livččii ollu muitaleamoš. Muhtumat leat dorjon min čađa gaskka. – Fylkkamánni lei buorre veahkki dalle go bargagođiimet mánáidgárddi ásahemiin. Mii oaččuimet sierralobi doaimmahit mánáidgárddi, vaikko mis váilojedje olbmot.

Stivrajođiheaddji 27 jagi

Solbakk lea Deatnugátti sámemánáidgárddi stivrajođiheaddji leamaš álggu rájes, earret 6 jagi go ásai Oslos. Ii son dan dihte mieđa gohčoduvvot primus motor dán barggus. – Das dat várra boahtá, go mus alddán leat leamaš dan mađe olu mánát mánáidgárddis, mojohallá son.

Jearahallamis mii dahkkui 1986 stivajođiheaddji Solbakk dadjá buoremussan jos almmolaš ásahus jođiha mánáidgárddi, muhto ii juohke dáfus: - Eat oskkil suohkanii luoitit ovddasvástádusa ovdal go suohkanis lea mánáid­gárde­prográmma mii sihkkarastá sámegiela ja sámi kultuvrra. 34 jagi leat vássán, ja sámiid searvi ain oamasta mánáidgárddiid, ja lea plánemin vel goalmmát mánáidgárddi rahpat Deanušaldái. Loahpas dadjala vel ahte lea leamaš hearvás bargu jođihit mánáidgárddiid. Olggobealdeolmmožin gal oainnán dán sámi pionerabargun.