- Mii dárbbašat fágalaččat geahččat báikkálaš geavahusa miehtá Várjjaga, Retter dadjá. Finnmárkokommišuvdna galgá earret eará mearridit áššiid mat gusket oktasaš vuoigatvuođaide ja báikkálaš geavahussii. Dán oktavuođas berrejit Várjjat gielddat addit studeantastipeandda mastergrádadásis. Stipeanddaid berre addit studeanttaide geat leat Várjjagis eret, geat dutket báikkálaš fáttáid nu go mat areálageavahusa árbevieruid ja luondduresurssaid geavahusa. Eará miellagiddevaš fáddá livččii guovllu giliserviid rolla.

Čalmmustahttit báikkalaš geavahusa ja vuoigatvuođadilálašvuođaid

- Nugo omd Unjárga, go gielda suitá máksit čieža milliuvnna ruvnnu industriijavistái, de berre maid suitit ráhkkanit Finnmárkuopmodaga ásaheapmái. Livččii hui miellagiddevaš kártet ja čielggadit báikkálaš geavahusa dán oktavuođas. Retter čujuha ránnjágildii, Detnui, gos historihkkár lea guorahallamin Badjedeanu vuoigatvuođadilálašvuođaid. – Dan galggašeimmet miige Unjárggas bargat, dadjá Várjjaga sámediggeválgga vuosttaševttohas.

Rettera mielas galggašii studeantastipeandda juohkit máŋggaid jagiid. – Muhto, ferte gáibidit ahte studeanttaid čállinbarggut čalmmustahttet báikkálaš geavahusa ja báikkálaš vuoigatvuođadilálašvuođaid, Gunn-Britt Retter oaivvilda. Ovdalaččat maid lea gielda juohkán studeantastipeanddaid dakkár ámmahiidda main leat váilon bargit, ovdamearkka dihte dearvvašvuođabargit ja sámegieloahpaheaddjit. – Suohkan berre doalatit dán politihka, ja dál berre geahččalit historjjá-, servodatdutkan- ja jussastudeanttaid movttiidahttit dutkat. Gunn-Britt Rettera mielas berre stipeanda leat oalle stuoris, ja dat berre geatnegahttit studeanttaid almmuhit dieđuid fágalaš artihkkaliid bokte, ja vaikkeba gieldda neahttasiidduin almmuhit dieđuid.