Čállán: Synnøve Solbakken-Härkönen,

NSR 1. evttohas Kárášjoga válgabiires

Skuvlareforbma

10-jagi vuođđoskuvlla sámi oahppoplána – L97S – lei  dehálaš lávki sámi skuvlahistorjjás. Sámi skuvla lea aiddo dál ráhkkaneamen reforbmii maid norgga eiseválddit leat mearridan. NSR áigu sihkkarastit ahte oahpahusvuogádaga ođđa reforpmat váldet vuođu sámi oahppi ja sámi servodaga dárbbuin. Bargu sierra sámi oahppoplánaiguin lea dán oktavuođas dehálaš. Sámediggi ja NSR leat dán áigodagas vuoruhan barggu sihkkarastit sámi sisdoalu ođđa oahppoplánain. NSR lea maid bargan ”sámi oahpahusplakáhtain” mii galgá leat sámi skuvlla ja sámi oahpahusásahusaid vuođđu.

Joatkkaoahpahus

Go guoská joatkkaoahpahussii lea NSR leamáš mielde álggaheamen dehálaš gelbbolašvuođanannenprošeavttaid, ovdamearkka dihtii ahte buot joatkkaskuvlaoahppit Tromssa fylkkas galget oahppat sámi áššiid birra. NSR áigu ain bargat dainna ahte buot joatkkaskuvllaid oahppit olles riikkas galget oažžut oahpahusa sámi fáttáid birra, ja ahte ráhkaduvvojit sierra sámi oahppoplánat sámi joatkkaoahpahussii. Mii áigut maiddái sihkkarastit sámi oahppiid vuoigatvuođa oažžut oahpu sámegielas ja sámegillii. Sámi joatkkaskuvllat fertejit ovdánahttot sámi joatkkaoahpahusa ja rávesolbmuidoahpahusa ressursaguovddážin.

Erenoamášpedagogalaš ovdánahttin

Sámi mánát, nuorat ja rávesolbmot geain leat erenoamáš dárbbut, galget sihkkarastot heivehuvvon oahpahusfálaldaga ja erenoamášpedagogalaš veahki mii hukse sámi arvvuid ala. Sámi erenoamášpedagogalaš doarjjavuogádat ferte nannejuvvot. Ovdamearkan konkrehta prošeavttaide maid NSR lea dorjon dán áigodagas lea bargu erenoamášpedagogalaš gelbbolašvuođanannenplánain 2004-05. Plánas leat guovddážis lohkan- ja čállinváttisvuođat ja guovttegielalašvuohta julev- ja máttasámiguovlluin, Mátta-Tromssas ja Davvi-Nordlánddas.

Sámi oahpponeavvut

Váilot ain ollu oahpponeavvut sámegillii, sihke girjjit ja earálágan oahpponeavvut, olles oahpahusvuogádagas mánáidgárdedásis gitta universitehtadássái. Sámi oahppiin ja oahpaheaddjit galget leat sámegielat oahpponeavvut buot fágain ja buot oahpahusvuogádaga dásiin. Oahpponeavvut galget ovdánahttot ja ráhkaduvvot dađistaga go sámi skuvla rievdá ovdamearkka dihtii oahppoplánareforpmaid olis. Oahpahus ferte maid heivehuvvot vejolašvuođaide maid diehtojuohkin- ja gulahallanteknologiija addá.

Fysihkálaš biras

NSR oaivvilda ahte skuvllaid fysihkalaš birrasat fertejit leat plánaid gáibádusaid mielde. Buot sámi mánát – beroškeahttá gos riikkas orrot – galget beassat vásihit sámevuođa skuvlabirrasis. Sámivuođa oainnusin dagadettiin skuvllaid árgabeaivvis sámevuohta sáhttá šaddat lunddolaš oassi maiddái eará mánáid árgabeaivvis Norggas. Skuvlaastoáigefálaldat lea lunddolaš oassi oahpahusfálaldagas ja maiddái das galgá leat sámi sisdoallu sámi mánáide.

Alit oahppu ja dutkan

NSR lea nannen sámi nuoraid vejolašvuođa alit ohppui barggu bokte ásahit oahppostipendda allaskuvla- ja universitehtadássái. Máŋggabealálaš sámi oahpahusfálaldat lea hui dehálaš. NSR lea ožžon čađa ahte sámi dutkanprográmma galgá guhkiduvvot ja nannejuvvot. NSR áigu ain bargat dainna ahte nannet sámegielat dutkan- ja gelbbolašvuođabirrasiid, seammás go dutkan sámevuhtii guoski fáttáin dárogillii ja eará gielaide nannejuvvo. Buot sámi guovlluid allaskuvllain ja universitehtain galgá leat fálaldat kulturáddejumis ja sámi kulturoahpus. NRS:a mihttomearri lea oččodit dáid fáttáid buot profešuvdna- ja vuođđooahpuide geatnegahtton fáddán.

Jienas NSR Sámediggeválggas 2005!