Siv Kvernmo (psykiáhter ja UNN ossodatváldodoavttir Romssas) buvttii dán jagáš Riddu Riđđu semináras ovdan viiddis dutkama mii čájeha ahte sámi, dáčča ja kveana nuorat geavahit juste seammá meari gárrenmirkkuid. Dutkan lea čađahuvvon ollu Davvi-Norgga nuoraid gaskkas. Iešsoardin ii ge leat eambbo sámiid gaskkas go earáid gaskkas, vaikko dábálaš olmmoš orru leamen nu navdimin.

Norgga Sámiid Riikkasearvi oaivvilda ahte ferte lasihit buot doaimmaid mat hehttejit gárrenmirkkogeavaheami lassaneames. - Erenoamážit lea dehálaš hehttet sámi nuoraid gárrenmirkkogeavaheami, dadjá Davvi Norlándda NSR-listtu 2. evttohas Roger Pedersen. Pedersen dadjá ahte NSR áigu oččodit heivehuvvon sosiála- ja dearvvaš­vuođabálvalusaid. Bálvalusat galget leat heivehuvvon geavaheaddji dárbbuide ja kultuvrralaš duogážii. - NSR oaidná dárbbu dasa ahte servodat bargá duođalaččat hehttet gárrenmirkko­geavaheami nuoraid gaskkas, ja ordne eambbo arenaid main nuorat sáhttet deaivvadit lagas birrasis, gárrenmirkko haga, dadjá Roger Pedersen. 

Pedersen deattuha ahte NSR atná hui dehálažžan ahte sosiála ja dearvvašuođasuorggi profešuvdna- ja vuođđooahpahusat nannejuvvojit dakko bokte ahte máŋggakultuvrralaš máhttu ja máŋggagielalaš máhttu váldojuvvo mielde oahpuide.

Roger Pedersen atná dehálažžan ahte dearvvašvuođabargiin, ja álbmogis muđuid, leat duohta ja rievttes dieđut gárremirkkogeavaheami birra Davvi-Norggas. - Ii leat riekta ahte sámiid gaskkas leat eambbo gárrenmirkkogeavaheaddjit go earáid gaskkas, vaikko olbmot dan jáhkket, ja vaikko sámit ieža maid dan jáhkket. Dát čájeha ahte lea dárbu gealbbu loktet buot dásiin, ja dan ovddas áigu ge NSR árjjálaččat bargat Sámedikki bokte, dadjá Pedersen.