Norgga Sámiid Riikkasearvi (NSR) lea behtohallan go aiddo válljejuvvon sámediggeráđđi man duogábealde leat Bargiidbellodat, Árja, Davvikalohttaálbmot, Sámit geat ásset lullinorggas ja Åarjel-Saemiej Gielh, biehttalit almmolašvuhtii čájehit soahpamuša mii lea vuođđun ovttasbargui. Vaikke stuorát rabasvuohta lea ge leamašan sin deháleamos ášši.

Soahpamuš gávdno, muhto lea čiegus

Bargiidbellodaga parlamentáralaš jođiheaddji, Willy Ørnebakk, lea Sámedikki sárdnestuolus duođaštan ahte gávdno čálalaš soahpamuš mo juohkit posišuvnnaid. Muhto son ii oaidnán dárbbu almmustahttit dán soahpamuša.

Unnán jáhkehahtti hállat rabasvuođa birra go ieža čihket dieđuid

- Mu oainnu mielde lea unnán jáhkehahtti go sámediggeráđđi hállá rabasvuođa ja gulahallama birra go gearddi čiegadit dákkár dehálaš dieđuid. Álbmogis lea dehálaš diehttit sisdoalu ja hatti dákkár soahpamušain. Dál čiegadit soahpamuša vuođu, ja olmmoš dieđusge báhccá imaštit manin, cealká NSR parlamentáralaš nubbinjođiheaddji, Geir Tommy Pedersen. – Mii lea doppe mii ii gierdda beaivečuovgga?

Dárogillii/på norsk