NSRa oaidnu lea čielggas. Mearrasámi vuoigatvuođat galget dohkkehuvvot ja čállojuvvot láhkii. – Mii eat sáhte hilgut dán earenoamáš vejolašvuođa. Smith-lávdegotti evttohusat galget farggamusat čađahuvvot danin go dain lea mearrideaddji váikkuhus mearrasámi kultuvrii ja eará guolástanservvodagaide, maiddái olggobealde Finnmárkku, dadjá NSR doaibmi jođiheaddji, Gunn-Britt Retter.

Jus mearrasámi vuoigatvuođat dohkkehuvvojit ja čállojuvvojit láhkii dál, de dat mearkkaša, nu mo Smith-lávdegoddi ge árvala, ahte nannejuvvo prinsihppan ahte álbmogis geat ásset vuotnagáttiin ja miehtá rittu Finnmárkkus lea guolástan­vuoigatvuohta mearas olggobealde Finnmárkku historjjálaš geavaheami ja álbmotrievttálaš njuolggadusaid vuođul mat gusket álgoálbmogiidda ja veahádatálbmogiidda. Vaikko ákkastallama vuođđun leat eamiálbmotvuoigatvuođat, evttoha Smith-lávdegoddi ahte dát guolástanvuoigatvuohta guoská buot álbmotjoavkkuide.

Dákkár riektái gullá vuoigatvuohta bivdit guoli iežas atnui, ja de vuoigatvuohta sáhttit álgit guolásteaddjin ealáhusas; ja dasto riekti ámmátbivdin bivdit guoli dan muttos ahte dat addá ekonomalaš vuođu dállodollui, juogo birgejupmin okto dahje ovttas eará ealáhusain. Dát riekti lea ovttaskas guolásteaddjis guolástus­eise­válddiid guovdu, ja mas ii gáibiduvvo ahte guolásteaddji galgá oastit bivdoeari.

Norgga Sámiid Riikasearvvis lea čielga vuordámuš ahte Sámediggi galgá lihkostuvvat oažžut mearrisámiid vuoigatvuođaid nannejuvvot láhkii čuovvovaš ráđđádallamiid oktavuođas. – Dás lea sáhka kultuvrras mas lea máŋggaid duháhiid jagiid historjjá mii sáhttá duššat, mii oaivvildat Norgga eiseválddiin lea ovddasvástádus dáhkidit dan boahtteáiggi, cealká Retter loahpadettiin.

----------

På norsk / darogillii