Sámediggeráđđi lea dorjon ovddeš NSR-árvalusa gos Várdobáiki sámi guovddáš, Evenáššis, galgá beassat lágidit dearvvasvuođa deaivvademiid vuorrasiidda, sihke ásahusaid olggo- ja siskkobealde. Dál háliidivčče NSR ahte maiddái eará guovlluin galggašedje fitnet dákkár doarjaga. Álggadettiin ráhpat vejolašvuođa oažžut doarjaga doaimmaide Guovdageainnus, Mázes, Ruŋggus, Snåasas ja Oslos.

– Mii háliidit ahte áhkku ja áddjá beasašivčče deaivvadit ja sámástit, ja ahte galggašedje beassat dearvvasvuođaovdánahttiin doaimmaide searvat báikkálaččat, lohká NSR joavkojođiheaddji Aili Keskitalo. – Mii diehtit eambbosat geainna juo leat dákkár fálaldagat, muhto lea váttisvuohta ruhtadit dán doaimma. Mii dovdat maid ásahusaid geat áiggoše álggahit vuorrasiidda fálaldagaid. Mii diehtit dákkár fálaldagat nannejit eallinkvalitehta ja agi.

NSR oaivvilda Várdobáikki doaimmat Evenáššis lea buorre ovdamearka maid sáhtášii čuovvulit eará sámi guovddážiin. Guhkit áiggis dáhtošeimmet dát galggašii fálaldat mii gávdnošii buot máŋgga báikegottiin miehtá Sámi. Guovdageainnus ja Mázes leat doaibmaguovddážat suohkana hálddus, muhto doaibma áitojuvvo geanehis suohkanbušeahtaid geažil.

– Mii eat sáhte lihkkáge vajáldahttit ahte máŋga sámi vuorrasat ásset gávpogiin, nugo Oslos, ja ahte dát galggašii boahtit buorrin sidjiide maid, lohká Aili Keskitalo. – Danne leat mii ilus go Sámi viessu Oslos lea plánat álggahit doaimmaid sámi vuorrasidda.

Sámedikki 2011 bušeahtta gieđahallo dál Sámedikki plána- ja finansalávdegottis.

---------

På norsk / darogillii