2017is lea 100 jagi dan rájes go sámi sáŋgár Elsa Laula Renberg lei njunnošis lágideamen vuosttaš sámi riikačoahkkima Troanddimis. Dát historjjálaš dáhpáhus lea ge maid vuođđun sámi álbmotbeaivvi ávvudeapmái guovvamánu 6. beaivvi.

Norgga Sámiid Riikasearvi ja Sámeálbmot bellodat (SáB) oaivvilda ahte Norgga Báŋku 100 jagi ávvudeami oktavuođas galggašii čorget saji muhtun ruhtaseattalii gos sámi historjjá muitaluvvošii. Sáhtášii lágidit dáiddagilvvu gos bovde dáiddáriid tevdnet sámi historjjá symbolaiguin ja govain mii muitala dehálaš dáhpáhusaid sámi historjjás. Elsa Laula Renberg govva vel galggašii ruhtaseattalii. 

– Ruhtaseattal sámi symbolaiguin ii dušše čalmmustahte sámi álbmoga Norggas, muhto buvttášii maid erenomaš vejolašvuođa álggahit ságastallamiid min historjjá birra, lohká Sámediggeáirras Gunn-Britt Retter, NSR/SáB áirras Nuortaguovllu válgabiires.

Jos dákkár jurdda ii meinnestuva, de galggašii oččodit ávvuruđa (omd. 20 ruvdnui) 2017 jahkelohkái, sámi vuosttaš riikačoahkkima muitun.

Retter lea ovdal bloggen sámegiela geavaheami birra Norgga ruđain.

----------

På norsk / darogilli