Ann-Mari Thomassen guhte lea Viesttarmeara válgabiire sámediggeáirras ja miellahttun NSR parlamentáralaš jođihangottis lea ilus go Nordlándda fylkkamánni nammaduvvon bargojoavku lea gárvvistan čielggadeami bohccuid vuojáhallama birra ruovdemáđijas Sáltoduoddaris. – Mun rámidan bargojoavkku ja Nordlándda fylkkamánni go leat gávnnahan dárkilis doaibmabijuid man geahpidivčče elliidbiinnideami Sáltoduoddaris, lohka son.

Nordlándda Fylkkamánnii lea bargojoavkku árvalusaid vuođul evttohan ceggemis bistevaš áiddi gaskal Luonusvákki stašuvnna ja Russanes Saltdal suohkanis. Dasa lassin evttohuvvojit cegget gaskaboddosaš plástaáiddiid dárbbašlaš gearggusvuođadoaibman heahtedilis. –Nordlándda Fylkkamánni evttoha buori  ja boahtteáigásaš doaibmabijuid mat heaittihit gillámušaid, lohka Ann-Mari Thomassen. – Mun váillahan seammás plánejuvvon áiddi huksema gaskal Semska ja Sørelva mii ruhtaduvvui 2009. Dát áidi livččii áigá juo galgan huksejuvvot!

– Mun hástalan johtolatministara Magnhild Meltveit Kleppa ja eanandoallo- ja biebmoministara Lars Peder Brekk farggamusat juolludit dárbbašlaš ruđaid stáhtabušeahta bakte. Vuhtiiváldimis sihke olbmuid ja elliid oktavuođas lea čielga servodatovddasvástádus gávdnat loahpalaš čovdosiid mat bissehit elliid vuojáhallamis Nordlándda ruovdemáđijas Sáltoduoddaris, loahpaha Thomassen.

----------

På norsk / darogillii