Sámediggeáirras ja Norgga Sámiid Riikkasearvvi (NSR) parlamentáralaš jođihangotti láhttu Ann-Mari Thomassen, gii ieš lea Skániin eret, čujuha dasa ahte fylkkaráđđi jámma evttoha heaittihit skuvlafálaldaga Skániin. Dát mielddisbuktá eahpesihkarvuođa sihke ohppiide ja oahpaheddjiide. – Mun balan dát čuohcá skuvlafálaldaga rekrutteremii ja ahte dat čuohcá sámegiela ovdáneapmái guovllus, cealká Thomassen.

Ferte gulahallat

-NSR vuordá dál ahte aiddo válljejuvvon Sámediggeráđđi gulahallá Romssa fylkkasuohkaniin ja ahte sii čujuhit ovttasbargosoahpamuššii mas ulbmil lea bisuhit áidna resursajoatkkaskuvlla márkosámi guovllus, dadjá Thomassen. – Bb lea válgagiččus čuoččuhan ahte sis leat siskkáldas gulahallanlinjját Bargiidbellodagas buot dásiin. Dál lea Sámediggeráđis vejolašvuohta praktihkalaččat čájehit ahte dát gulahallanlinjját doibmet, cealká Ann-Mari Thomassen.

Dehálaš ahte bargu joatká

- Sihke Romssa fylka ja Sámediggi leat guhkit áiggi badjel geavahan návccaid hukset sámi sisdoalu oahpahusas, nu mo lea deattuhuvvon ovttasbargosoahpamušas gaskal Sámedikki ja Romssa fylkkasuohkana, muitala áiddo válljejuvvon jođiheaddji Sámedikki oahpahus-, ovdamoraš- ja bajásšaddanlávdegottis Silje Karine Muotka (NSR). – Danin lea nu dehálaš ahte dát bargu ii bisán.