– Mun lean hirbmosit movttáskan go lean lohkan sámi giellaguovddážiid dieđáhusaid Sámediggái 2008 ovddas, cealká Åge Nordkild, NSR sámediggeáirras.

– Giellaguovddážiin lea ollu doaimmat, vaikko eai leat doarvái ekonomalaš resurssat fidnemis, lohká Nordkild, gii leat Sámedikki bajásšaddan-, fuolahus- ja oahpahuslávdegottis. – NSR sámediggejoavku evttohii 2009 bušeahttameannudeami oktavuođas lasihit doarjaga 300.000 ruvnnuin juohke giellaguovddážii. Mun oaivvildan ahte dieđáhusat mat leat ovddiduvvon Sámediggái meannuduvvot čájehit ahte lea stuora dárbu eanet ekonomalaš resurssaide, cealká Nordkild.

– Giellaolmmožin beroštan das ahte giellaguovddážat leat guovddáš bealit mat láhčet dili seailluhit giela girjáivuođa, earret eará go duođaštit ja viidásitovdánahttet sámi suopmaniid iežaset prošeavttain. Viidásit lea giellaguovddážiid doaibma giellaarenan dehálaš, cealká Nordkild, gii áigu bargat dan badjelii ahte giellaguovddážat ožžot eanet resurssaid boahtteáiggis. – Mun áiggun ovddidit ášši giellaguovddážiidda eanet doarjaga birra dan oktavuođas go Sámediggi meannuda muddejuvvon bušeahta.

---------

På norsk / darogillii