Valla akta udnásj NSR:a sámedikkeájrrasijs, Miriam Paulsen, la galla mierredam sån Sámedikkev guodá ja ij hálijda joarkket sámedikkeájrrasin tjavtja rájes.
Sihtá ietjas lagámusájt vuorodit
Paulsen gut guokta ájggegávda la Sámedikken tjåhkkåham dåbddå dárbov båddåj politihkas.
– Iv mån hálijda joarkket sámedikkeájrrasin. Sivva l gå hálijdav vuorodit ietjam familjav. Mån lav ham oadtjum guokta máná oanegis ájgen, ja hálijdav vuorodit ietjam lagámusájt. Mån doajvov nágin ietjes gut politihkalasj bargguj astijt, diedet ietjas kandidáhttan, javllá Miriam Paulsen.
Paulsen vuornnu jut smávvamáná ja fámilljaiellem la gássjel kombinerit dåjmalasj politihkajn.
– Iv da javla ij dåhkki kombinerit familljaiellemav ja politihkav. Ij la de dat mij la sivva, valla mån dåbdåv munji la dálla muddo vehi båttåv politihkas válldet, javllá Paulsen.
– Ep la majdik mierredam
Så guhtimusj de sjaddá ájras NSR:a listan julevsáme guovlos la rabás gatjálvis uddni.
Sálto sámesiebren le sebrulasjtjåhkanibme dán lávvodagá gånnå galggi ságastallat guhtimuttja lulu kandidatáhta.
Siebre jådediddje Hugo Kalstad, ij hálijda almodit majdik dálla javllá sån NRK:aj.
Valla nav gåk NRK dádjat lulu åvdep sámedikkepresidenta Sven Roald Nystø:a niehpe, nuorra ja Sálto sámesiebre stivraájras, Sandra Nystø Ráhka jali Sálto sámesiebre jådediddje Hugo Kalstad, guovtes gudi luluba lisstakandidáhta.
Ij ga Miriam Paulsen sidá nammadit suv tjuovvov.
– Iv de mån galga avtak nammadit. Dav viertti Sálto sámesiebrre ja nominasjåvnnå Viestarmeran mierredit, javllá Paulsen.
NSR:an li uddni gålmmå ájrrasa Sámedikken ja Barggijbelludagán guokta, aktij vihtta ájrrasa Viestarmera válggabijran.
Boahtte sámedikkeválggaj bessi dåssju nieljes sisi dát válggabijras.
Dan diehti sjattasj stuoráp gilpustallam listaj gaskan gudi lulu Sámediggáj bessat.
Ja goassa NSR:a galggá nominasjåvnnåtjåhkanimev tjadádit ij ga la tjielgas.
Lista galggi sisi åvddål vuoratjismáno nuppát biejve, ja dan diehti ij la dal råhtto NSR:aj.
– Ep la mij ájn mierredam goassa nominasjåvnnåtjåhkanibme sjaddá. Jáhkedahtte sjaddá maŋŋegietjen guovvamáno jali gassko snjuktjamáno. Dat esski tjielggá boahtte vahko gietjen, subtsas NSR:a guovloválggastivra jådediddje Viestarmera válggabijran Roger Pedersen NRK:aj.
