Sus bohtet muitui Álttá ákšuvdna ja Guovdageainnu stuimmit, go gullá mo stuorradiggi gáibida dál, ahte eanandoallominister gohčču badjeolbmuid njuovvat bohccuideaset bákkuin.
Dát lea suorggahahtti, oaivvilda Norgga Sámiid riikkasearvvi parlamentáralaš jođiheaddji Aili Keskitalo.
- Dát muittuha vássán áiggi, sihke Álttá ákšuvnnas ja maid dan dološ historjjás, go Guovdageainnus čađahedje baggonjuovvamiid 1852. Son ádde gal dan duššástuvvama stáhta bealis, muhto baggonjuovvamiid fertejit maid boazodoalus beassat dohkkehit, lohká Keskitalo.
- Dál ferte juoga nu dáhpáhuvvat
Bargiidbellodaga parlamentáralaš nubbijođiheaddji Martin Kolberg lohká, ahte baggonjuovvamat eai sahte álggahuvvot,
ovdal go buot riektegažaldagat leat čielggaduvvon, muhto eai sáhte álo ođđasit mearridit seamma ášši iige mihkkige dáhpáhuva.
- Riektegažaldagat mannet ovddabeallai politihkkálaš mearrádusaid, Norgga stuorradiggi ii sáhte gieđahallat seamma ášši máŋgii, muhto ii miige dahkkojuvvo.
Boazodoallohálddahus lea vuđolaččat guorahallan makkár váikkuhusat sáhttet šaddat, go boazologu galget vuolidit Finnmárkkus.
Riska-analysas čállá boazodoallohálddahus boazodoallostivrii, ahte boazologu vuolideapmi šaddá váttisin ja badjealbmát soitet miellaeavttus saboteret nu, ahte eai sáhte njuovvat.
- Go juo leat ráhkadan dákkár analysa, de dat muitala, ahte dákkár plánat leat árvvoštallama vuolde. Go dieinnalágiin einnostit, mo boazodoallit soitet láhtte, de ovtta láhkai leat sii dubmemin boazodolliid vearrodahkkin, muhto seammás, ii son ge jáhke, ahte boazodoallit mielas servet dáid doaimmaide, dadjá Keskitalo.
GULDAL:
