Sotnabeaivve doalai Norgga Sámiid Riikasearvvi riikastivrra čoahkkimis Kárášjogas. Doppe mearrededje evttohit riikačoahkkimii váljjet searvvi dálá jođiheaddji Aili Keskitalo NSR presideantakándidahtan sámediggeválgii 2013. Muitala NSR nubbijođiheaddji Gunn Britt Retter NRK Sápmái.
NSR riikačoahkkin dollojuvvo golggotmánu loahpas.
Dá vulobealde lea maid NSR čállá preassadieđáhusasttis:
Norgga Sámiid Riikkasearvi (NSR) lea čoahkkimis čakčamánu 16. b. 2012:s nomineren Aili Keskitalo iežas presideantakandidáhttan 2013 sámediggeválgii.
– Riikkastivra lea ilus ja movttet go Keskitalo lea háliidan nominerejuvvot NSR presideantakandidáhttan, dadjá NSR politihkkalaš nubbinjođiheaddji Inge Even Danielsen.
– Aili lea doaimma bokte NSR jođiheaddjin áigodagas 2003–2005 ja 2008 rájes otnážii jođihan organisašuvnna diplomáhtalaš ja čohkkejeaddji jođiheaddjin. Su ámmáhis ovddeš sámediggepresideantan ja dál parlamentáralaš jođiheaddjin NSR sámediggejoavkkus, son lea čájehan ahte son lea duostilis ja hui buorre presideantan sámi álbmogii, dadjá Gunn-Britt Retter, NSR organisatuvralaš nubbinjođiheaddji.
Riikkastivra háliida fas Aili Keskitalo ruovttoluotta presideantan ja lea giitevaš go Aili fas áigu bargat organisašuvnna ja sámi álbmoga ovddas.
– NSR:s lea válgagižžu juo guhká leamašan jođus, Ailiin njunnožis. Dáinna mii háliidit dieđihit ahte riikkastivra ollislaččat doarju su, ja son lea min vuosttaševttohassan oažžut fas NSR ruovttoluotta jođihišgoahtit Sámedikki, loahpaha sihke Retter ja Danielsen movttegiid.
