Oslo Sámiid Searvi lea váidán iežas ovddit jođiheaddji, Mikkel Gaup, politiijaide.
Sivvan lea go searvvis čuoččuhuvvo, ahte Gaup lea geassit váldán 10.000 kruvnnu lobi haga sin báŋkokontos.
- Dasa sus ii leat kommeanta dál, lohká dát dovddus neavttár NRK:ii. 44-jahkásaš Gaup ii lean gullan dán áššis maidige, ovdalgo NRK válddii suidne oktavuođa.
- Ádden juoidá boastut?
Advokáhta dadjá ahte Mikkel Gaup áigu dál váldit oktavuođa Oslo Sámiid Servviin háleštan dihte ášši birra. Advokáhta árvala maid, ahte ášši duogážis sáhttá leat boasttuáddejupmi.
- Son ii hálit gal muitalit eanet das, justa man dihte dát lea boasttuáddejupmi, čilge advokáhta, gii ovddasta Mikkel Gaup.
Oslo Sámiid searvi guđii váidaga mannán duorastaga. Ii okta ge stivrraláhttuin hálit dadjat áššis maidige, muhto duođaštit, ahte lea dolvon váidaga Guovddáš politiijastašuvdnii.
Stivrra lahttut lohket iežaset máŋgii viggan oažžut Gaup sagaide, muhto eai leat fáhten su, danne lei váidda áidna vejolašvuohta.
Lokten ruđa guktii
Sullii njeallje mánu maŋŋá, go son lei geassádan jođiheaddjin, loktii son oktiibuot 10 000 ruvnnu Sámiid Searvvi guovtti sierra kontos.
NRK:s lea báŋkoguitet, main oidno, ahte Gaup lea vuolláičállán dáid borgemánu 1. beaivvi 2012. Nubbi dain lea 6000 ruvnnu ja nubbi fas 4000 ruvnnu. Maŋŋá dáid bázii kontoide ruhta 2.523 ruvnnu ja 89 evrre.
NRK lea jearran Gaupas, manne son lea lokten dáid ruđaid.
- Dása sus ii leat kommentára, muhto son dárkkista dán, lohká Gaup.
- Lei buorre dáhttus
Gaup lei formálalaččat jođiheaddjin Oslo sámesearvvis gitta jahkečoahkkin rádjai, mii dollojuvvui njukčamánu 13. beaivvi dán jagi. Dán čoahkkimis válljejuvvui Hege Marstein ođđa jođiheaddjin. Gaup lei ovdal jahkečoahkkima dieđihan válgakomiteai, ahte ii hálit šat joatkit doaimmas.
Mikkel Gaup advokáhta oaivvilda lihkká, ahte Gaup ii diehtán, ahte son ii lean šat jođiheaddjin, go loktii dáid ruđaid.
- Oaivvildago dát, ahte Gaup ii livčče dalle lobihuššan ja dagai dan buorre dáhttuin?
- Sus lea dakkár áddejupmi, vástida advokáhta Thor Bache-Wiig.
Geassádii jođiheaddjin
Advokáhta lea NRK:ii čuoččuhan, ahte Mikkel Gaup ii jáhkkimis diehtán, ahte ii lean šat jođiheaddji, go válddii daid ruđaid, iige Gaup advokáhta mielde diehtán jahkečoahkkimis maidige.
Gaup lea goittotge ieš sádden E-boastta searvvi nuppi jođiheaddjái guovvamánu 22. beaivvi 2012. Dás šálloša son, go sus lea unnán áigi dáid doaimmaide ja son ferte nu geassádit jođiheaddjin.
Bovdehus jahkečoahkkimii lei sáddejuvvon láhttuide ođđajagimánu 30 beaivvi.
Dáhtui bálkká
Duogáš dasa, go Mikkel Gaup loktii 10 000 ruvnnu sámesearvvi kontos lea okta dáhpáhus, man sámesearvi ordnii Langøyas geassit 2011.
Gálduid mielde, geain NRK leamaš oktavuođas, muitalit, ahte Gaup gáibidii oasi dán dáhpáhusa dietnasis, dan ovddas maid son lei bargan doppe.
- Eai dalá, eaige ođđa stivrra lahttutge dieđe makkárge šiehtadusa dahkkon dán áššis. Searvvis buohkat barge guhkes beivviid dán dáhpáhusa ovdii, iige sis lean šiehtadus, ahte Mikkel Gaup galggašii oažžut dás sierra bálkká. Dienas dás manai Utøya As fitnodahkii, muitala okta stivrraláhttuin.
Dása dadjá advokáhta Bache-Wiig, ahte justa dás sáhttá leat sáhka, go hállojuvvo boasttuáddejumis.
Váldá oktavuođa sámesearvái
- Maid dii áigubehtet bargat viidásut dainna áššiin?
- Dál lea ášši váidon ja danne lea lunddolaš, ahte Mikkel Gaup gohččojuvvo politiijaid lusa gažahallamii. Muhto son áigu gal váldit oktavuođa sámesearvái ja dáhttut ságastallama singuin, vai čielggašii, gii dás lea ádden boastut ja maid, muitala advokáhta Bache-Wiig.
GULDAL: