NRK Sámi Radios lea otne prográmmaráđđečoahkkin ja dohko lea ráđđi bovden NSR:a Nuoraidlávdegotti ovddidit iežas giellacuiggodemiid. Nuoraidlávdegotti stivrralahttu Ol-Juhan Gaup lohká geardduhit dan maid giđđát vávje.
- Fáláldagat nuoraide ja mánáide eai leamaš ollislaččat sámegillii ja sii leat guhkká moaitán dan, go neahttasiidduit rahppá de leat visot varrasamos ođđasat dárogillii, lohka Gaup.
- Eanet sámegiela
Norgga sámiid riikkasearvvi nuoraidlávdegotti stivrralahttu Ol-Johán Gaup mielas NRK Sámi Radios ii leat sámegielas dat sajádat mii galggašii prográmmafálaldagas. Son galgá otne NRK Sámi Radio prográmmeráđđečoahkkimii čilget oainnus eanet. Sámi Radio hoavda Nils Johan Hætta lohká ávkkálažžan oažžut ovdan cuiggodemiid vaikke vel leage son ieš gii loahpa loahpa mearrida áššis.
- Sámeradiohoavdahan ii eale seahka siste ja ferte guldalit ja váldit vuhtii iešguđetlágan oainnuid ja daid vuođul ain buoređit fáláldaga álbmogii, muitala Hætta.
- Dehalaš fáláldat
Mediediehtti ja álgoálbmotáššedovdi Magne Ove Varsi oaivvilda servodagas berre leat váikkuhanvejolašvuohta.
- Go Sámeradio lea stuorimus ja dehaleamos mediafáláldat sámi servodagas, de lea maid dehalaš, ahte sii guldalit maid servođat sávvá sihke giela ja sisdoalu ektui.
GULDAL: