Keskitalo cuiggoda áigumuša go gullá Johnsena dál áigut bivdit veahki daid váddámus čuolmmaide mat gullet Tromssa - ja Davit Nordlándda guovllu boazodoaluide. Keskitalo imašta manne mannan giđa rájes jo ii leat váldon oktavuohta go dalle han lei juo konvenšuvdnaášši Sámedikkis.
Norggabeali ákkat
Bajásšaddan-, fuolahus- ja oahppolávdegoddi dat bargá dáinna áššiin ja olles lávdegoddi lei ovttaoaivvilis ikte ahte dárbbaša guhkit áiggi bargat ovdal sáhttá
mearkkašumiid ovddidit konvenšuvdnii, ja dasa gulli guovllu protokollaide, mat lagabuidda čilgejit gos ruoŧa- ja norgga beale boazodoalliin galget leat guođohanvuoigatvuođat. Otne lea beaivit Sámedikke čoahkkinjođihangoddi mearridan ahte lávdegoddi sáhttá bargat áššiin ja ovddidit cealkámušas easkka miessemánu dievasčoahkkimis, áiddo nu mo lávdegoddi ikte dovddahii.
Johnsen mieđiha ahte sis leat dušše norggabeali guluskuddancealkámušat maid vuođul galggašedje meannudit áššiin.
Su mielas ii oro dat doarvái ja nu livčče ge dalle lunddolaš jearrat veahki Ruoŧa Sámedikkis, oaivvilda áššejođiheaddji Geir Johnsen.
Lávdegotti lahttu Ellinor Marita Jåma duođašta ahte sin árvvoštallanvuođđun leat dušše norgga beali guluskuddancealkámušat ja daid vuođul sii galggašedje gieđahallat ášši.
– Doarjut vai ii doarjut
Norgga ja Ruoŧa stáhtaid bajimuš eiseválddit leat čállán vuollái juo dán konvenšuvnna.
– Sámediggi lea dása viežžan guluskuddan cealkámušaid ja
rievtti mielde lea lávdegotti bargun dál dušše dohkkehit dahje ii dohkkehit konvenšuvnna ja guovllu protokollaid, muhto min hástalussan šaddá maid lihkká gávnnahit váikkuhusaid ja daidda juoidálágan čovdosiid, oaivvilda Jåma.
– Ruoŧŧa ahtanuššan
Lávdegotti lahttu Anders Somby junior maid bealušta vuosttažettiin norgga beali boazosápmelaččaid dili.
– Mu mielas gal lea čielggas ahte norggabeali boazodoallit dat šaddet gillát dán oktavuođas, ja guovlluprotokollat dat dagahti ahte mii fertet lagabuidda geahččat daid rivttiid mat norggabeali badjeolbmuin leat daidda guovlluide.
Jus geahččat 72:i šiehtadusa ektui, de oaidnit ahte ruoŧŧabeali boazodoallu lea ahtanuššan máŋggain čuđiin proseanttain, lohká Somby.