Les på norsk.
Ráđđehus almmuhii otne jahkásaš stuorradieđáhusa sámi giela, kultuvrra ja servvodaga birra.
Gielddaid ovddasvástádus fállat buriid ja ovttadássásaš bálvalusaid maiddái sámi álbmogii dat lea váldo fáddán dieđáhusas dán jagi.
– Ráđđehussii lea deaŧalaš jođihit dakkár sámepolitihka mii fuolaha ahte eanebuidda šattaše sámegielat ja sámi kultuvra olámuddui, ja mii buvttášii soabadeami, áddejumi ja ovdáneami sámi servodagaide.
Nu cealká gielda- ja guovloministtar Kjersti Stenseng preassadieđáhusastis.
Dát gielddaid geatnegahttin sámi bálvalusaid dáfus lea ráđđehusa mielas dehálaš ja buorre vuohki čuovvulit Duohtavuođa- ja soabahan kommišuvnna rávvagiid, deattuha son.
Bargiidbellodaga sámediggepresideantaevttohas ja Kárášjoga sátnejođiheaddji, Svein Atle Somby, mai lohká leat dehálaš čuovvulit kommišuvnna evttohusaid ja rávvagiid konkrehta čovdosiid, iige dušše sániid bokte.
– Dál leat guorahallamin gielddaid bálvalusaid sámiide. Mihttomearrin lea ahte sámegielat ja sámi kultuvrra leat fálaldahkan eanet olbmuide Norggas, ja nu geahččalit duddjot buoret áddejumi servodagas.
Nu cealká Somby preassadieđáhusastis maŋŋá stuorradiggedieđáhusa almmuheami.
Son lea dáid beivviid čuovvumin Bargiidbellodaga riikačoahkkima Oslos.
