Hopp til innhold

Liikon go Keskitalo joatká

NSR:a áirras Sámedikkis, Guovdageainnu sátnejođiheaddji Klemet Erland Hætta mielas lea buorre go Keskitalo lohpida leat NSRa presideantaevttohas.

Klemet Erland Hætta Naranaš birra
Foto: Piera Balto / NRK

Aili Keskitalo dieđihii ikte NSRa riikkastivrii, ahte son vuolgá presideanttaevttohassan 2009 sámediggeválggaide.

Son fidne maid stuorra doarjaga NSR:a báikkálaš servviin.

GULDAL: Keskitaloi doarjja

Vuosttas nisu

Aili Keskitalo šáttai vuosttaš sámi nisson Sámedikkepresideantan jagi 2005:as. Dalle moite soapmásat ahte son ii lean ovdal doaibman politihkkárin parlamentáralaš systemas, ja ahte Keskitalo dan sivas ii lean rivttes olmmoš láidestit Sámedikki.

Aili Keskitalo
Foto: Mohammed Alayoubi / NRK

Guovdageainnu sátnejođiheaddji, Klemet Erland Hætta ii leat ovttaoaivilis dalá moaitagii, ja lohká Keskitalo dán golmma jagis čájehan ahte son lea duostilis politihkkár.

Geassádii diibmá

Keskitalo mearredii geassádit Sámedikkepresideantan jagi 2007:as, máŋŋil go čuožžiledje ovttasbargováttisvuođat NSR:a ja dáid smávit joavkkuid gaskkas sámediggeráđis.

NSR:a parlamentáralaš nubbinjođiheaddji, Randi Skum, oaivvilda ahte Keskitalo čájehii politihkálaš givrodaga ja nanusvuođa go geassádii.

Aili Keskitalo lea leamaš Norgga Sámiid Rikkasearvvi jođiheaddji jagi 2003 rájes. Sámedikki vuogádagas lea son erenomážit beroštan ovddidit giella- ja skuvllaáššiid. Seammás lea son áŋgirit ovddidan sámiid vuoigatvuođaid, nugo mat minerallága oktavuođas.

Doarjja servviin

Maiddái Iinná ja biras sámiid searvvi jođiheaddji, Ann-Mari Thomassenas lea stuorra luohttámus Aili Keskitaloi nugo NSR:a riikkastivrra presideantaevttohassan.

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.