– Ii leat gánnáhahti ráhkadit dán elektrovdnálaččat sámegilli, čilge Vearrodirektoráhta diehtojuohkkindirektevra Lise Halvorsen.
Váttis bargu
Vearrodirektoráhta diehtojuohkkindirektevra Lise Halvorsen jáhkká menddo divrras ráhkadit elektrovdnálaš sámegiel skobiid ja dasa lassin lea divrras heivehit rusttegiid dusttet sámegiela.
Lise Halvorsen biddjá ovddasvástádusa dán barggus Brønnøysund registtári.
Vearrodirektoráhta diehtojuohkkindirektevra Lise Halvorsen lohká dál dušše 141 olbmo geat leat dáhttun vearrodieđáhusa sámegilli.
– Eat leat garvimin sámegiela go ná dáhkat, lohká Lise Halvorsen.
Reivves eará vásttádus
Norgga Sámiid Riikasearvi lea jearran eiseválddiin eai go sáhtte sápmelaččaide addit sámegiel fálaldaga elektrovdnálaččat maid. Čálalaš vástádus Vearrodirektoráhta diehtojuohkkindirektevrras Lise Halvorsenis NSR;ii lea ahte ii leat gánnáhahti dien dáhkat, go lea beare divrras moatti olbmui heivehišgoahttit rusttegiid.
NSRa Sámediggeáirras Klemet Erland Hætta dat lea jearran dán birra, ja son ii leat gal duđavaš vástádusan.
Ii vuollán
– Imaš go eai sáhtte molsut rusttegiid dán várás ja vel dat go lohket nu unnán olbmot geat geavahit sámegiel fáladaga, imašta Hætta.
Son ii leat vuollánan áššis ja bargagoahttá njunoš eiseválddiid ektui ja jearrá eai got beroš sápmelaččain go elektrovdnálaččat eai ráhkat sámegiel fálaldaga.
Klemet Erland Hætta maid dáhttu diehttut mo eará álmmolaš ásahusain šaddá nu go elektrovdnálaš gulahallama ektui.
