– Deatnu gal lea oalle ollu geavahan ruđa sámi oahpponeavvuide, oaivvilda Deanu sátnejođiheaddji Frank Ingilæ.
Eai hátnás
Deanu sátnejođiheaddji Frank Ingilæ ii loga gieldda gal hátnástallan go leat oasttán sámegiel girjiid, muhto ahte dat stuorámus váttisvuohta lea leamaš fitnet sámegielat oahppogirjiid ja dainna berre sámediggi bargat.
Sámediggeráđi strategelaš plána ulbmil lea ge justa buoredit beliid mat guosket oahpponeavvobuvttadeapmái, leš dal lágádusaid-, ráhkadeaddjiid dahje čálliid birra sáhka.
Ii váldde eret ovddasvástádusa
Guovdageainnu sátnejođiheaddji Klemet Erland Hætta ii jáhke dát moktege váldá eret dan ovddasvástádusa mii dál lea gielddain oahpponeavvuid oktavuođas.
Jus Sámediggeráđi árvalus dohkehuvvo de vedjet gielddat veahaš seastit ruđa go ožžot nuvttá muhtin ráje oahpponeavuin.
– Jos seastit dán bokte de nannet skuvllaid daid ruđaiguin, lohppida Deanu sátnejođiheaddji Frank Ingilæ.
Dáhttu ovttasbarggu
Norgga Sámiid Riikasearvi ii oainne ávkki fállat nuvttá sámi oahpponeavvuid gielddaide, jos gielddat geavahit ordnega dušše danin go lea heajos ruhtadilli.
NSR hálida ovdal oktasaš áŋgirdeame mas Sámediggi, gielddat ja ráđđehus ovttas oččodisgohttet eambbo sámi oahppneavvuid, ja movttidahttet fágaolbmuid searvat buvttadeapmái.
– Dárbbaša oahpponeavvuid ovdalgo daid sáhttá juohkigoahttit nuvttá gielddaide, lohká NSR:a Aili Keskitalo.
