NSR sámediggeáirras Synnøve Solbakken-Härkönen dattetge ii áiggo váidit Čielga Jiena áirasa, Jánoš Trostena, politiijaide gielisteames, nu movt skábmamánus geažiidii
Ii boahtán čoahkkimii
Duogáš áššái lea dat mii dáhpáhuvai Sámedikki dievasčoahkkimis diimmá skápmámánu go gieđahalle Sámedikki ja Tromssa filkkagielda ovttasbargošiehtadusa. Jánoš Trosten ii ihtán dievaščoahkkimii vaiikko vel beaiveordnega mielde galggai lean áššejođiheaddji. Dát ráhkadii unohisvuođaid Sámedikkis.
Maŋŋá Trosten čilgii ahte son lei addán dieđu Sámedikki bajáššaddan- ja oahppokomitea jođiheaddjái Synnøve Solbakken-Härkönenii ahte lea bealálaš áššis, ja danin ii sáhttán oassálastit áššemeannudeames.
Muhto Solbakken-Härkönen biehttalii Trostena addán dákkár dieđu sutnje. Trosten ges vástiidii ahte Solbakken-Härkönen gielista, ja čuožžuhii iežas sáhttit duođaštit dan.