Norgga Sámiid Riikasearvvi Sámediggejoavku hálida ahte Sámedikkis dat galgá leat váldo-ovddasvástádus sámi joatkkaohppui.
Sii eai doarjjo dalle dan maid Sámediggeráđđi lea evttohan, ahte stáhtas ain galgá leat ovddasvástádus.
Stivret joatkkaoahpu
Sii evttohit maid guorahallat lea go vejolaš ásahit sierra sámi oahpahusdirektoráhta Sámediggái. Seammás hálidit Sámediggái ollislaš ovddasvástádusa sámi joatkkaohppui.
Nu lea ge NSR:a áibbas eará oaivilis go Sámediggeráđđi, mii lea evttohan ahte stáhtas dat ain galgá leat váldoovddasvástádus sámi joatkkaskuvllaid doibmii ja Finnmárkku fylkkagielddas gis dat hálddašeapmi.
NSR:a ii duđa dasa ahte sámedikkis galgá leat váldoovddasvástádus, go sii hálidit maid ásahit sierra sámi oahpahusdirektoráhta Sámedikki vuollái.
Sihkarastit ruđaid
Sin mielas lea hirpmahahtti go ráđđi ii leat vuđolaččát čielggadan dán ášši, ja dat goazaha sámi joatkkaoahpu ovdáneami. Solbakken Härkönen gal mieđiha ahte eai leat dál vel riekta gergosat váldit dán doaimma badjelasaset go earret eará ekonomija bealli ii han leat čielggaduvvon.