Oslo sámisearvi dat bivdá ovttasbarggu gieldda njunnožiin ráhkadan dihte plána mii dáhkida sámiide bistevaš fálaldagaid. Fabian Stang deattuha ahte jos diekkár plána ráhkada de ferte dainna goit leat čielga mihttomearri.
- Jos diekkár plána vuos galgá ráhkadit, de ferte gal das čielga mihttomearri, lohká Fabian Stang.
Ii dušše bábirlána
- Plána dahje áigumuščálus ii berre goit de šaddat dušše báberlátnan mas eai oidno bohtosat dahje mas eai leat čielga mihttomearit, cealká Oslo ságadoalli Fabian Stang.
Fabian Stang lohká ahte jos sámiin ležžet čielga evttohusat dasa maid sáhtašii buoridit dálá dilis ja mo ovdáneame sihkkarastit pláná bokte, de váldá son áinnas vuostá daid. Stang maid deattuha ahte son áinnás gulahallá sámiin dán birra, ja lasiha ahte son goit ferte vuos dieđuid oažžut nugo sámi oahpahusa dili birra Oslos ovdalgo son sáhttá nu olu eanet dadjat gieldda dálá bálvalusaid sámiid ektui.
Bivdet čoahkkima
Oslo sámisearvi lea dan vahkus sádden reivve ráđđevissui ja bivdá čoahkkima sagadoalliin ja gávpotráđi njunnožiin. - Dálá dilis ii leat Oslo sámiin doarvái buorre oadjebasvuohta das ahte ieš guđet ge lágan bálvalusat sidjiide bisuhuvvojit ja ovdánahttojit. Nu lohká Oslo Sámisearvvi njunuš, Kirsti Guvsam.
- Sii háliidit ahte Oslo gielda galgá ollislaččat geahččat ollašuhttet go sii iežaset geatnegasvuođaid sámiide ja sámegielat olbmuid ektui Oslos, ja mo sáhttá boahtteáiggis dáhkidit ahte fálaldagat sámiide šaddet bistevaččan, lohká Guvsám.
Eahpesihkkarvuohta
Ovdamearkka dihte dovdet sámi oahpaheaddjit eahpesihkkarvuođa go eai dieđe man viiddis sámegiel oahpahus bálvalusa gielda áigu fállat ja sámi mánáidgárdi maid vásiha ahte gielda bahkkeha dohko dáža mánáid jos fal deivet leat guoros sajit oanehis dahje guhkit áigge, čilge Guvsam. - Vuorrasat sámiide Oslos maid váilu fálaldat ja eará bealli ges lea ahte oslo ássit - erenoamžit oahpaheaddjit dárbbašit eanet dieđuid sámiid birra, lohká Guvsam.
Galleda sápmelaččaid
Oslo ságadoalli goit lohpida alcces háhkagoahtit eanet dieđuid sámiid dárbbuid birra Oslos. - Jurddašan muhtun lávvordaga guovlalit sámi viesus káfestállamen gávpotsápmelaččaigun, lohppida Fabian Stang.